माझं काहीच जात नाही… मोहम्मद शमीचं मोठं विधान; टीम इंडियातील निवडीबाबत नेमकं काय म्हणाला?

चार वर्षांच्या प्रतीक्षेनंतर भुवनेश्वर कुमारने भारतीय क्रिकेट संघाच्या टी-२० संघात पुनरागमन केले आहे. अनुभवी वेगवान गोलंदाज मोहम्मद शमीला अद्याप भारतीय संघात आपले स्थान परत मिळवायचे आहे. भुवीच्या पुनरागमनावर आणि त्याच्याकडे होत असलेल्या सततच्या दुर्लक्षावर मोहम्मद शमीने आपला संताप व्यक्त केला आहे. त्याने आपली निराशा अत्यंत स्पष्टपणे व्यक्त केली आहे. मोहम्मद शमी यापूर्वीही आपल्या वक्तव्यांमुळे चर्चेत आला आहे.

जेव्हा मोहम्मद शमीला भुवनेश्वर कुमारच्या निवडीबद्दल आणि संघापासून त्याच्या दूर असण्याबद्दल विचारण्यात आले तेव्हा त्याने स्पष्टपणे सांगितले की, भुवनेश्वर कुमारला भारतासाठी खेळण्याची संधी मिळाली आहे. ही त्याच्यासाठी चांगली गोष्ट आहे. पण त्याच्या निवडीशी माझा काहीही संबंध नाही. जिथे कुठे मला खेळण्याची संधी मिळेल, तिथे मी माझे १००% देईन. सध्या माझे संपूर्ण लक्ष रणजी ट्रॉफीच्या सामन्यांवर आहे.

शमीने निवड समिती आणि संघ व्यवस्थापनावर टीका करताना म्हटले की, गेल्या दोन-तीन वर्षांपासून माझ्यासोबत हेच घडत आहे. मी सातत्यपूर्ण कामगिरी करत आलो आहे. बंगालसाठी माझी तंदुरुस्ती सिद्ध केली आहे. असे असूनही जर मला पुन्हा भारतीय संघाकडून खेळण्याची संधी मिळाली नाही , तर त्यात माझे काही नुकसान नाही. ३६ वर्षीय मोहम्मद शमी भारतासाठी शेवटचा २०२५ च्या चॅम्पियन्स ट्रॉफीमध्ये खेळला होता. तेव्हापासून फिटनेसच्या समस्या आणि निवड समितीने तरुण खेळाडूंना दिलेल्या प्राधान्यामुळे तो संघाबाहेर आहे.

दुसरीकडे आयपीएल २०२६ मधील प्रभावी कामगिरीनंतर भुवनेश्वर कुमारने न्यूझीलंड दौऱ्यासाठीच्या टी-२० संघात पुनरागमन केले आहे. असे मानले जाते की, २०२७ च्या एकदिवसीय विश्वचषकाच्या योजनांचा भाग म्हणून त्याचे मूल्यांकन केले जात आहे. अशा परिस्थितीत, वेस्ट इंडिजविरुद्धच्या सध्याच्या मालिकेत सपाट खेळपट्ट्यांवर भारतीय गोलंदाजांची धुलाई झाल्यानंतर चाहते आणि तज्ज्ञ सातत्याने अनुभवी गोलंदाजांची बाजू घेत आहेत, ज्यामुळे शमीची व्यथा उघडपणे समोर आली आहे.

२०२३ च्या विश्वचषकापासून शमीची तंदुरुस्ती ही त्याच्यासाठी आणि भारतीय संघासाठी चिंतेचा विषय ठरली आहे. विश्वचषकानंतर तो बराच काळ संघाबाहेर होता. चॅम्पियन्स ट्रॉफीच्या अगदी आधी त्याचे पुनरागमन झाले. पण त्या स्पर्धेनंतर त्याला पुन्हा वगळण्यात आले. याच काळात माजी मुख्य निवडकर्ता अजित आगरकर आणि शमी यांच्यात माध्यमांमार्फत आरोप-प्रत्यारोप झाले. मात्र आता आगरकर यांनी निवड समितीतून राजीनामा दिला आहे. भुवनेश्वर कुमारचेही पुनरागमन झाले आहे. तर मग शमीचेही पुनरागमन होऊ शकते का? या प्रश्नाचे उत्तर येत्या काही दिवसांत मिळेल.