क्रिकेट सामना रंगात आला होता, पण तेवढ्यातच मैदानात माकडाची एन्ट्री; क्रिकेटपटूवर हल्ला अन्… पाहा व्हायरल व्हिडिओ
Monkey Attack Cricket Match: मैदानात सामना सुरू असताना अचानक माकडाची एन्ट्री झाली. त्याने महिला क्रिकेटपटूवर हल्ला केला. यानंतर खेळ थांबवण्याची वेळ आली होती.
नागपूरमध्ये महिलांच्या १९ वर्षांखालील टी-२० ट्रॉफीमध्ये कर्नाटक आणि विदर्भ यांच्यातील उपांत्यपूर्व सामन्यादरम्यान एक विचित्र घटना घडल्याचे समोर आले आहे. मैदानावर अचानक एक माकड आल्याने कर्नाटकची तरुण क्षेत्ररक्षक उमा काश्वी क्षणभर घाबरल्याचे पाहायला मिळाले. ही घटना गुरुवारी, २२ ऑक्टोबर रोजी नागपूरमध्ये घडली आहे. या घटनेचा व्हिडिओ व्हायरल झाला आहे.
उमा काश्वी सीमारेषेजवळ क्षेत्ररक्षण करत असताना एक माकड अचानक तिच्या दिशेने धावत आले. १५ वर्षीय काश्वीने स्वतःला वाचवण्याचा प्रयत्न केला. पण तिचा तोल गेला आणि ती खाली पडली. माकड तिच्या जवळून निघून गेले. त्यानंतर ती लगेच उठली. या घटनेचा व्हिडिओ सोशल मीडियावर व्हायरल झाला आहे. या असामान्य घटनेनंतरही काश्वी एकाग्र राहिली आणि तिने गोलंदाजीत उत्कृष्ट कामगिरी केली आहे.
तिने आपल्या चार षटकांत केवळ १८ धावा देऊन तीन महत्त्वपूर्ण बळी घेतले. तिच्या कामगिरीने कर्नाटकच्या विदर्भावरील रोमांचक सहा धावांच्या विजयात महत्त्वाची भूमिका बजावली. प्रथम फलंदाजी करताना कर्नाटकने २० षटकांत सात गडी गमावून १४० धावा केल्या. खुशी सूर्यकांतने नाबाद ३३ आणि कर्णिका कार्तिकने २३ धावा केल्या. प्रत्युत्तरात विदर्भ २० षटकांत सात गडी गमावून केवळ १३४ धावाच करू शकला. ज्यामुळे कर्नाटकला सामना जिंकता आला.
कर्नाटकचा सामना आता २४ ऑक्टोबर रोजी उपांत्य फेरीत बडोद्याशी होईल. दुसरी उपांत्य फेरी दिल्ली आणि हरियाणा यांच्यात खेळवली जाईल. सर्व सामने नागपूर येथील लेडी अमृतबाई डागा कॉलेजच्या मैदानावर खेळवले जातील. मात्र सामन्यादरम्यानचा तो व्हिडिओ प्रचंड व्हायरल होत आहे. त्यावर अनेक प्रतिक्रिया येत आहे.
तर दुसरीकडे उमा काश्वीची ही कामगिरी अशा वेळी झाली आहे, जेव्हा तिची महिला प्रीमियर लीग २०२७ च्या लिलावासाठी आधीच नोंदणी झाली आहे. तिची मूळ किंमत १० लाख रुपये आहे. या युवा खेळाडूला आशा आहे की, देशांतर्गत क्रिकेटमधील तिची प्रभावी कामगिरी WPL फ्रँचायझींचे लक्ष वेधून घेईल.
