Prithvi Shaw: महिनाभरापूर्वी साखरपुडा मोडला, आता पुन्हा जुळले सूर; पृथ्वी शॉ आणि आकृती अग्रवालच्या लव्ह लाइफमध्ये नवा ट्विस्ट
Prithvi Shaw Akriti Agarwal Patch Up: पृथ्वी शॉ-आकृती अग्रवाल यांच्या प्रेमकहाणीत नवा अध्याय सुरू झाला आहे. त्यांनी पुन्हा एकत्र येण्याचा निर्णय घेतला आहे.
बऱ्याच काळापासून भारतीय क्रिकेट संघाबाहेर असलेला पृथ्वी शॉ पुन्हा एकदा त्याच्या वैयक्तिक आयुष्यामुळे चर्चेत आहे. गेल्या महिन्यात त्याची होणारी पत्नी आणि अभिनेत्री आकृती अग्रवालसोबतचा साखरपुडा मोडल्याची घोषणा केल्यानंतर आता या दोघांनी त्यांच्या नात्याला दुसरी संधी देण्याचा निर्णय घेतला आहे. याबाबत आकृती अग्रवालने सोशल मीडियावर एक पोस्ट शेअर केली आहे. यात तिने ते दोघं पुन्हा एकत्र आल्याचं सांगितलं आहे.
आकृती अग्रवालने सोशल मीडियावर एक पोस्ट शेअर करून जाहीर केले आहे की, त्यांच्यातील गैरसमज दूर झाले असून ते पुन्हा एकत्र आले आहेत. पृथ्वी आणि आकृती गेल्या दोन वर्षांपासून एकमेकांना डेट करत होते. यावर्षी ८ मार्च रोजी त्यांचा थाटामाटात साखरपुडा झाला होता, पण साखरपुड्यानंतर अवघ्या सहा महिन्यांतच त्यांनी गेल्या महिन्यात विभक्त झाल्याची घोषणा केली.
इन्स्टाग्रामवर शेअर केलेल्या पोस्टमध्ये तिने लिहिले की, आकृतीने तिच्या पूर्वीच्या निर्णयाची संपूर्ण जबाबदारी स्वीकारली आहे. जेव्हा मी माझा साखरपुडा मोडला, तेव्हा मी माझ्या जवळच्या लोकांच्या मतांनी प्रभावित झाले, ज्यांना वाटत होते की ते आमच्या नात्याला माझ्यापेक्षा जास्त चांगल्या प्रकारे ओळखतात. मला वाटते की माझी दिशाभूल झाली आणि आमच्यात व्हायला हवी असलेली प्रामाणिक चर्चा न करताच मी हा मोठा निर्णय घेतला.
आकृती अग्रवाल पुढे म्हणाली, “मी त्या निर्णयाची आणि त्यामुळे झालेल्या वेदनांची संपूर्ण जबाबदारी घेते.” आकृतीने स्पष्ट केले की, त्या दोघांमध्ये मनमोकळी चर्चा झाली, ते एकमेकांना समजून घेऊ शकले आणि त्यांनी पुन्हा एकत्र येण्याचा निर्णय घेतला आहे. तिने सर्वांना त्यांच्या नव्या सुरुवातीचा आणि वैयक्तिक निर्णयाचा आदर करण्याचे आवाहनही केले.
आकृती अग्रवाल ही इंस्टाग्रामवर लाखो फॉलोअर्स असलेली एक सुप्रसिद्ध इन्फ्लुएन्सर आहे. ती अभिनय क्षेत्रातही कार्यरत असून, अनेक प्रोजेक्ट्स आणि डिजिटल कंटेंटच्या माध्यमातून तिने स्वतःची ओळख निर्माण केली आहे. यामुळे ती नेहमी चर्चेत असते.
