IPL 2026 स्पर्धा सुरू असताना पॅट कमिन्स ऑस्ट्रेलियाला परतला, हैदराबादचा कर्णधार परतणार की नाही?

आयपीएल 2026 स्पर्धेत पॅट कमिन्सच्या गैरहजेरीत कर्णधारपदाची धुरा इशान किशनच्या खांद्यावर देण्यात आली आहे. पण तरी पॅट कमिन्स लवकर मैदानात परतेल याची प्रतीक्षा केली जात आहे. कारण दुखापतीमुळे सुरूवातीच्या काही सामन्यात पॅट कमिन्स खेळणार नाही. पण सनरायझर्स हैदराबादच्या ताफ्यात असल्याने एक पाठिंबा होता. पण अचानक पॅट कमिन्स मायदेशी परतला आहे. त्यामुळे चर्चांना उधाण आलं आहे. स्पर्धा सुरू होण्यापूर्वी पॅट कमिन्स भारतात आला होता. पण दोन सामने झाल्यानंतर ऑस्ट्रेलियाला रवाना झाला आहे. एका रिपोर्टनुसार, पॅट कमिन्स आता एप्रिल महिन्याच्या तिसऱ्या आठवड्यात परतणार आहे. त्यामुळे आणखी काही दिवस इशान किशनला कर्णधारपदाची भूमिका पार पाडावी लागणार आहे.

पॅट कमिन्स मायदेशी परतण्याचं कारण काय?

ईएसपीएन-क्रिकेइंफोच्या रिपोर्टनुसार, सनरायझर्स हैदराबादचा कर्णधार पॅट कमिन्स पाठिच्या दुखापतीने त्रस्त होता. मागच्या एक वर्षापासून त्याला पाठदुखीचा त्रास आहे. त्यामुळे जुलै 2025 पासून फक्त एकच सामना खेळला आहे. त्याने एशेज कसोटी मालिकेतील फक्त एका सामन्यात भाग घेतला होता. त्यानंतर संघाबाहेर गेला होता. त्यानंतर टी20 वर्ल्डकप 2026 स्पर्धेला मुकला. आता स्पर्धेत खेळण्यासाठी पुन्हा एकदा पाठिच्या दुखापतीची तपासणी करण्यासाठी मायदेशी परतला आहे. ऑस्ट्रेलियाला गेल्याने पॅट कमिन्स आणखी काही सामन्यांना मुकणार आहे. रिपोर्टनुसार, पॅट कमिन्स ऑस्ट्रेलियात फायनल स्कॅन करेल आणि त्यात सर्वकाही ठीक असेल तर 17 एप्रिलला पुन्हा एकदा परतेल.

पॅट कमिन्स किती सामने खेळणार नाही?

पॅट कमिन्सची सध्याची स्थिती पाहता कमीत कमी चार सामने मुकण्याची शक्यता आहे. त्यामुळे आता थेट 21 एप्रिलला दिल्ली कॅपिटल्सविरुद्ध होणाऱ्या सामन्यात खेळण्याची शक्यता आहे. पॅट कमिन्सच्या गैरहजेरीत हैदराबादची गोलंदाजी कमकुवत दिसत आहे. आरसीबीविरुद्धच्या सामन्यात 200 पार धावा करूनही रोखता आलं नाही. त्यामुळे पहिल्या सामन्यात पराभवाचं तोंड पाहावं लागलं. तर कोलकाताविरुद्धच्या सामन्यात विजय मिळवला. आता पॅट कमिन्सच्या गैरहजेरीत हैदराबादचा संघ राजस्थान रॉयल्स, मुंबई इंडियन्स आणि पंजाब किंग्सविरुद्ध खेळणार आहे. त्यामुळे या सामन्यात अडचणीचा सामना करावा लागू शकतो.