IND vs WI: धडाकेबाज खेळी खेळली तरीही अभिषेकला सामनावीर पुरस्कार मिळाला नाही, नेमका मिळाला तरी कोणाला?
IND vs WI 3rd T20: भारत आणि वेस्ट इंडिज यांच्यात टी-२० मालिका सुरु असून भारतीय संघाने तिसरा सामना जिंकला.या सामन्यात अभिषेक शर्माने तुफान खेळी खेळली. या खेळीनंतरही त्याला सामनावीर पुरस्कार मिळाला नाही.
IND vs WI 3rd T20: इंदूरच्या होळकर स्टेडियमवर झालेल्या रोमांचक तिसऱ्या टी२० सामन्यात भारताने वेस्ट इंडिजचा १४ धावांनी पराभव केला. या विजयासह भारतीय संघाने मालिकेत २-१ अशी महत्त्वपूर्ण आघाडी घेतली. भारताच्या विजयात अभिषेक शर्मा आणि इशान किशनने जोरदार खेळी खेळली. अभिषेकने अवघ्या ३० चेंडूंमध्ये ६९ धावांची धडाकेबाज खेळी केली. अभिषेकला सामनावीरचा पुरस्कार मिळेल असे वाटत होते. पण त्याला हा पुरस्कार न मिळता भलत्याच खेळाडूला पुरस्कार मिळाला.
सामना संपल्यावर ‘सामनावीर’ पुरस्कार अभिषेक शर्माला नव्हे, तर वेगवान गोलंदाज अर्शदीप सिंगला मिळाला. अर्शदीपने सामन्यात उत्कृष्ट गोलंदाजी करत चार षटकांत ४४ धावा देऊन तीन महत्त्वपूर्ण बळी घेतले. वेस्ट इंडिजच्या डावात, जेव्हा पाहुणा संघ लक्ष्याचा पाठलाग करताना अत्यंत धोकादायक वाटत होता आणि सामना भारताच्या हातून निसटत असल्याचे दिसत होते, तेव्हा अर्शदीपच्या उत्कृष्ट गोलंदाजीने आणि अचूक यॉर्कर्सनी सामन्याचे चित्र पालटले. त्याने एका उत्कृष्ट यॉर्करवर धोकादायक शेर्फेन रदरफोर्डला बाद करून वेस्ट इंडिजच्या विजयाच्या आशा धुळीस मिळवल्या. यापूर्वी त्याने शाई होपला क्लीन बोल्ड केले होते आणि कीमो पॉलला तिलक वर्माकरवी झेलबाद केले होते.
सामन्यातील सामनावीरचा पुरस्कार जिंकल्यानंतर अर्शदीप सिंग म्हणाला की, “आज वातावरण चांगले होते आणि चेंडू थोडा रिव्हर्स होत होता. मागील सामन्यात दव पडल्यामुळे अडचण आली होती, पण आज त्याने नियोजनानुसार गोलंदाजी केली. संघात कोणीही वरिष्ठ किंवा लीडर नाही, वातावरण खूप शांत आणि मैत्रीपूर्ण आहे. एक आंतरराष्ट्रीय खेळाडू म्हणून चांगले आणि वाईट दिवस येतात, त्यामुळे शांत मनाने खेळणे महत्त्वाचे आहे. योग्य लाईन आणि लेंथ राखून सुरुवातीला नवीन चेंडूने आणि नंतर जुन्या चेंडूने गोलंदाजी करणे हे त्याचे मुख्य लक्ष आहे.”
या सामन्यात, प्रथम फलंदाजी करताना भारतीय संघाने २२३ धावा केल्या. अभिषेकसोबतच इशान किशननेही १८ चेंडूंमध्ये ३७ धावांची वेगवान खेळी केली. तिलक वर्माने १६ चेंडूंमध्ये २८ धावांचे योगदान दिले. अक्षर पटेलने १४ चेंडूंमध्ये २० धावा केल्या. प्रत्युत्तरात, वेस्ट इंडिजला २० षटकांत ७ गडी गमावून केवळ २०९ धावाच करता आल्या. अर्शदीप व्यतिरिक्त, नमन धीरनेही या सामन्यात दोन बळी घेतले. टीम इंडियाने आता मालिकेत २-१ अशी आघाडी घेतली आहे.
