किशोरी पेडणेकर यांची आज विरोधी पक्षनेतेपदी घोषणा होणार

मुंबई महानगरपालिकेची आज दुसरी विशेष सभा पार पडणार आहे. महापौर आणि उपमहापौर पदाच्या निवडणुकीनंतर ही दुसरी महत्त्वपूर्ण सभा आहे. या सभेत किशोरी पेडणेकर यांची विरोधी पक्षनेतेपदी अधिकृत घोषणा होणार असून, सत्ताधारी भाजपचे गटनेते गणेश खणकर यांची सभागृह नेते म्हणून घोषणा केली जाईल.

आजच्या बैठकीत मुंबई महानगरपालिकेच्या स्थायी, शिक्षण, सुधार आणि बेस्ट समित्यांच्या सदस्यांची नावे देखील घोषित केली जातील. पालिकेची सर्वसाधारण दुसरी सभा असून, यात विरोधी पक्षनेत्यासोबतच गटनेत्यांची आणि सभागृह नेत्यांची घोषणा होणार आहे. मुंबई महानगरपालिकेच्या इतिहासात पहिल्यांदाच महिला विरोधी पक्षनेत्याची घोषणा केली जात आहे. विशेष म्हणजे, सध्याच्या महापौर देखील महिला आहेत. शिवसेनेकडे ६५ नगरसेवक निवडून आल्याने, किशोरी पेडणेकर यांच्या विरोधी पक्षनेतेपदावर आज शिक्कामोर्तब होईल.