पैठणमध्ये गोदावरी पात्रात सोनं शोधण्यासाठी तौबा गर्दी! काय आहे प्रकार?

छत्रपती संभाजीनगरच्या पैठण शहरात नाथषष्ठी उत्सवाच्या पार्श्वभूमीवर गोदावरी नदीच्या पात्रातील पाणी पातळी कमी करण्यात आली आहे. पाणी ओसरल्यामुळे नदीचे पात्र उघडे पडले असून, या गाळात सोनं शोधण्यासाठी शेकडो नागरिकांनी गर्दी केली आहे. हातात चाळण्या आणि टोपल्या घेऊन अनेक जण आशेने सोन्याच्या शोधात आहेत.

स्थानिक श्रद्धेनुसार, विधीदरम्यान अर्पण केलेल्या सोन्या-चांदीच्या वस्तू किंवा दागिने अस्थींसोबत नदीत विसर्जित केले जातात. पाणी कमी झाल्यावर हेच सोनं शोधण्यासाठी नागरिक नदीपात्रात उतरतात. या सोन्याच्या शोधात असलेले अनेक जण ऊसतोड कामगार आहेत, जे हंगाम संपल्याने गावाकडे परतले आहेत. त्यांच्यासाठी हा उदरनिर्वाहाचे एक साधन बनले आहे. पैठणच्या गोदावरी पात्रात दररोज हजारो नागरिक, ज्यात महिला आणि पुरुषांचा समावेश आहे, सोनं आणि नाणी शोधण्याचे काम करत आहेत.