Delhi Lal Quila Blast : दिल्ली स्फोटानं हादरली, मुंबईत हायअलर्ट… मेट्रो परिसरात नेमकं काय घडलं? प्रत्यक्षदर्शीनं जे सांगितलं ते भयानक

दिल्लीच्या लाल किल्ल्यासमोरच्या पार्किंगमध्ये पावणे सातच्या सुमारास एका इको व्हॅनमध्ये भीषण स्फोट झाला. या घटनेत नऊ जणांचा मृत्यू झाला असून अनेकजण जखमी झाले आहेत. स्फोटाची तीव्रता इतकी होती की, आसपासच्या तीन ते चार गाड्या पूर्णपणे जळून खाक झाल्या, तर आठ ते दहा इतर वाहनांचेही मोठे नुकसान झाले. अनेक वाहनांचे फक्त सांगाडेच शिल्लक राहिले. या स्फोटामुळे परिसरात मोठी आग लागली होती. स्फोटानंतर दिल्लीत हाय अलर्ट जारी करण्यात आला असून, मुंबईमध्येही सुरक्षा वाढवण्यात आली आहे.

राष्ट्रीय सुरक्षा गार्ड (NSG) आणि राष्ट्रीय तपास यंत्रणा (NIA) च्या पथकांनी घटनास्थळी धाव घेतली आहे. स्फोटाचे नेमके कारण आणि इको व्हॅन किती वेळापासून पार्किंगमध्ये उभी होती, याबाबत तपास सुरू आहे. प्रत्यक्षदर्शींनी दिलेल्या माहितीनुसार, स्फोट इतका भयानक होता की रस्त्यावर मानवी अवयव विखुरले होते.