डोंबिवलीत मनसेला मोठा धक्का! राजकीय समीकरणे बदलणार?

डोंबिवलीत महाराष्ट्र नवनिर्माण सेनेला (मनसे) मोठा धक्का बसला आहे. मनसेचे जिल्हाध्यक्ष प्रकाश भोईर, त्यांच्या पत्नी सरोज भोईर यांच्यासह शेकडो कार्यकर्ते आणि पदाधिकाऱ्यांनी भारतीय जनता पार्टी (भाजप) मध्ये प्रवेश केला आहे. भाजपचे नेते रवींद्र चव्हाण यांच्या उपस्थितीत हा पक्षप्रवेश सोहळा पार पडला.

या पक्षप्रवेशामुळे कल्याण-डोंबिवलीतील राजकीय घडामोडींना वेग आला आहे. रवींद्र चव्हाण यांनी या पक्षप्रवेशाबद्दल आनंद व्यक्त केला. त्यांनी सांगितले की, प्रकाश भोईर आणि सरोज भोईर हे अनेक वर्षांपासून महानगरपालिका आणि डोंबिवलीमध्ये एकत्र काम करत आहेत. नगरसेवक म्हणून काम करत असताना तांत्रिक अडचणींमुळे त्यांना वेगवेगळ्या पॅनेलमध्ये राहावे लागले होते. कार्यकर्त्यांनी भाजपमधून लढण्याचा निर्णय घेतला, त्याबद्दल चव्हाण यांनी भोईर आणि त्यांच्या कार्यकर्त्यांचे आभार मानले. हा प्रवेश कल्याण-डोंबिवलीमध्ये भाजपसाठी सकारात्मक वातावरण निर्माण करणारा असल्याचे चव्हाण यांनी म्हटले आहे.