… तरी लाडकी बहीण बंद होणार नाही! एकनाथ शिंदेंनी स्पष्टच सांगितलं

दहिसर येथे आयोजित जाहीर सभेत उपमुख्यमंत्री एकनाथ शिंदे यांनी स्थानिक नागरिकांना संबोधित केले. यावेळी त्यांनी लाडकी बहीण योजना कुणी कितीही अफवा पसरवल्या तरी बंद होणार नाही, असे ठामपणे सांगितले. शिंदे यांनी रतन नगर फेडरेशनचा प्रश्न तात्काळ सोडवण्याचे आश्वासन दिले. तसेच, साईनाथ नगर रेल्वे पटरीवरील रहिवाशांना येणाऱ्या नोटिसांचा प्रश्न केंद्रीय मंत्र्यांशी बोलून मार्गी लावणार असल्याचे नमूद केले.

अंबावाडी येथील एसआरए प्रकल्प राबवण्याची ग्वाही देत, मुंबईकर बाहेर का गेले यावर चिंता व्यक्त केली. त्यांनी व्यापारी बांधवांना विकास आणि प्रगतीसाठी शिवसेना-भाजप महायुतीला पाठिंबा देण्याचे आवाहन केले. महायुतीच्या उमेदवाराला विक्रमी मतांनी विजयी करण्याचे आवाहन करत, ही सभा प्रचाराच्या शेवटच्या दिवशी अत्यंत महत्त्वाची ठरली. महायुतीचे नेते सध्या विविध ठिकाणी जाऊन प्रचार करत आहेत.