Shiv Sena Ministers Boycott Cabinet : आधी शिंदेंच्या मंत्र्यांचा बैठकीवर बहिष्कार, नंतर CM च्या भेटीला, मुख्यमंत्र्यांच्या दालनात काय घडलं?

राज्य मंत्रिमंडळाच्या बैठकीवर शिवसेनेच्या (शिंदे गट) मंत्र्यांनी आज बहिष्कार टाकला. उपमुख्यमंत्री एकनाथ शिंदे वगळता अन्य कोणताही शिवसेनेचा मंत्री बैठकीला उपस्थित नव्हता. बैठकीनंतर, सर्व नाराज मंत्र्यांनी मुख्यमंत्री देवेंद्र फडणवीस यांच्या मंत्रालयातील दालनात त्यांची भेट घेतली. या भेटीमागे भाजपमध्ये स्थानिक पातळीवर सुरू असलेले पक्षप्रवेश आणि आगामी स्थानिक स्वराज्य संस्थांच्या निवडणुका हे प्रमुख कारण असल्याचे सूत्रांनी सांगितले.

भाजपने कल्याण-डोंबिवलीसह अनेक ठिकाणी शिवसेनेच्या माजी नगरसेवकांना पक्षात सामील करून घेतल्याने शिंदे गटात अस्वस्थता आहे. यामुळे स्थानिक स्वराज्य संस्थांच्या निवडणुकांमध्ये युतीमध्ये बिघाडी होण्याची शक्यता वर्तवली जात आहे. निधी वाटपावरूनही नाराजी असल्याची चर्चा आहे. मुख्यमंत्री फडणवीस यांच्याशी झालेल्या या भेटीत शिवसेनेच्या मंत्र्यांनी आपली भूमिका मांडली. ही भेट सुमारे १५-२० मिनिटे चालली, ज्यात मंत्र्यांनी त्यांच्या तक्रारी आणि अपेक्षा मांडल्याची माहिती आहे.