कोकणात शिमगोत्सवाचा उत्साह! परंपरा आणि संस्कृतीचं दर्शन

कोकणात होळी उत्सवाला शिमगोत्सव म्हणून मोठ्या उत्साहात साजरे केले जाते. यंदाही कोकणात परंपरेनुसार होळीचा उत्साह शिगेला पोहोचलेला दिसतो आहे. रत्नागिरी जिल्ह्यातील गुरुमळी या गावात होळी उभारण्याची एक विशेष परंपरा आहे, जिथे ७० फूट उंचीची सुरमाडाची होळी केवळ दोरीच्या साहाय्याने उभी केली जाते. ही काही टनांची होळी उभारण्याचा थरार अनुभवण्यासाठी ग्रामस्थ मोठ्या संख्येने एकत्र येतात.

या सोहळ्यात ढोल-ताशांचा गजर करत ग्रामदेवता श्रीदेव नवलाई पावनाई आणि जाकादेवीची पालखी नाचवली जाते. ग्रामस्थ अत्यंत भावपूर्ण वातावरणात खांद्यावर पालखी घेऊन नृत्य करतात. शिमगोत्सव हा कोकणी माणसासाठी आपल्या ग्रामदेवतेच्या चरणी लीन होण्याचा आणि आपल्या संस्कृतीशी जोडून घेण्याचा महत्त्वाचा क्षण असतो. या परंपरेतून कोकणातील अनोखी संस्कृती आणि सामूहिक एकतेचे दर्शन घडते.