Nashik Tapovan : नाशिक तपोवनातील प्रस्तावित प्रदर्शन केंद्राच्या निविदा प्रक्रियेला अखेर स्थगिती, मंत्री गिरीश महाजनांकडून मोठी माहिती

नाशिकच्या पवित्र तपोवन परिसरात प्रस्तावित प्रदर्शन केंद्रासाठी होणाऱ्या वृक्षतोडीच्या निविदा प्रक्रियेला अखेर स्थगिती देण्यात आली आहे. राज्याचे मंत्री गिरीश महाजन यांनी ही माहिती दिली. या योजनेनुसार, तपोवनातील अनेक झाडे तोडून त्या जागी एक भव्य डोम उभारण्यात येणार होता, ज्याचा वापर पुढील 32 वर्षांसाठी प्रदर्शन केंद्र म्हणून केला जाणार होता. या प्रकल्पाला पर्यावरणप्रेमी, सामाजिक कार्यकर्ते आणि विविध राजकीय संघटनांकडून तीव्र विरोध होत होता. पर्यावरणवाद्यांनी सुरुवातीपासूनच या वृक्षतोडीच्या विरोधात आवाज उठवला होता. त्यांच्या या भूमिकेला काही राजकीय संघटनांनीही पाठिंबा दिला.

विशेषतः महाराष्ट्र नवनिर्माण सेनेने (मनसे) नाशिकच्या तपोवनातील वृक्षतोडीविरोधात जोरदार आंदोलन छेडले. मनसेच्या चित्रपट सेनेचे अमय खोपकर यांच्यासह अनेक कलाकार या आंदोलनात सहभागी झाले होते. अमय खोपकर यांनी मुख्यमंत्री देवेंद्र फडणवीस यांना आवाहन करत, “जसे त्यांनी पार्थ पवारांना माफ केले, तसे आमच्या तपोवनातल्या झाडांना माफ करावे,” अशी विनंती केली होती. मनसेने तपोवनातील एकाही झाडाच्या फांदीला हात लावू देणार नाही, असा इशारा देत मोठे आंदोलन छेडण्याचा निर्धार व्यक्त केला होता.