चंद्रशेखर बावनकुळे हास्यास्पद विधानं करतात : छगन भुजबळ

नाशिक : राज्यातील वाद काही मिटताना दिसत नाही. छत्रपतीसंभाजी महाराज, औरंगजेब आणि त्यानंतर औरगंजेबजी. यानंतर आता जाणता राजावरून देखिल जोरदार राजकारण सुरू झालं आहे. राष्ट्रवादीचे नेते छगन भुजबळ यांनी आमच्यासाठी शरद पवार जाणते राजेच आहेत, असं विधान केल्याने भाजपचे प्रदेशाध्यक्ष चंद्रशेखर बावनकुळे यांनी त्यांच्यावर जोरदार हल्ला चढवला. त्यावर आता भुजबळ यांनी पलटवार करत बावनकुळे यांना उत्तर दिलं आहे.

बावनकुळे यांनी केलेल्या टीकेला भुजबळ यांनी उत्तर देताना, चंद्रशेखर बावनकुळे हे भाजपचे राज्याचे अध्यक्ष आहेत, त्यांनी मात्र हस्यास्पद, न पटणारी विधाने करू नयेत असा सल्ला भुजबळ यांनी दिला आहे. तसेच राष्ट्रवादीचे सर्वेसर्वा शरद पवार यांना आपण जाणता राजा का म्हणतो याचे स्पष्टीकरण ही आधीच दिल्याचंही त्यांनी सांगितलं.

तसेच भुजबळ यांनी तुम्ही पंतप्रधान नरेंद्र मोदी यांना विष्णूचा अवतार म्हणता त्यावर आम्ही काय म्हणतो का? असा सवाल करत बावनकुळे यांना प्रत्युत्तर दिलं आहे.