Thackeray Brothers : शिवालय ते मंत्रालय ठाकरे बंधूंची चर्चा नेमकी कशी रंगली? एकत्र प्रवास ते खुर्चीही शेजारीच! 20 वर्षांनंतर…

राज ठाकरे आणि उद्धव ठाकरे यांच्यातील वाढती जवळीक सध्या महाराष्ट्राच्या राजकारणात चर्चेचा विषय ठरली आहे. निवडणूक आयोगाच्या बैठकीपूर्वी, विरोधी पक्षांच्या बैठकीसाठी मनसे अध्यक्ष राज ठाकरे यांनी तब्बल २० वर्षांनी उद्धव ठाकरे यांच्या नेतृत्वाखालील शिवसेना (उद्धव बाळासाहेब ठाकरे) पक्षाच्या शिवालय कार्यालयाला भेट दिली. या भेटीनंतर उद्धव ठाकरे आणि त्यांचे पुत्र आदित्य ठाकरे राज ठाकरे यांच्या गाडीतून मंत्रालयात निवडणूक आयोगाच्या अधिकाऱ्यांशी चर्चा करण्यासाठी गेले.

मंत्रालयात मुख्य निवडणूक अधिकारी एस. चोक्कलिंगम यांच्यासोबतच्या बैठकीतही उद्धव ठाकरे आणि राज ठाकरे शेजारी शेजारी बसले होते. बैठकीनंतरही ते दोघे एकत्र दिसले, ज्यामुळे त्यांच्यातील युतीची केवळ औपचारिकता बाकी असल्याचे राजकीय वर्तुळात बोलले जात आहे. दरम्यान, १७ ऑक्टोबर रोजी दादर येथील छत्रपती शिवाजी पार्कवर मनसे आयोजित दीपोत्सवाचे उद्घाटन उद्धव ठाकरे यांच्या हस्ते होणार आहे. राज ठाकरे यांनी त्यांना यासाठी निमंत्रित केले आहे, हे बदलत्या राजकीय समीकरणांचे द्योतक मानले जात आहे.