‘मातोश्री’च्या अंगणाचा तिढा सुटला, उद्धव ठाकरेंनी ठरवलं वांद्रे महापौरांचे!

मुंबई : शिवसेनेच्या दृष्टीने अत्यंत महत्त्वाच्या असलेल्या ‘वांद्रे पूर्व’ या मतदारसंघाचा तिढा अखेर सुटला आहे. विद्यमान आमदार तृप्ती सावंत यांना डच्चू देत शिवसेनेने उमेदवारीची माळ मुंबईचे महापौर विश्वनाथ महाडेश्वर (Mayor Vishwanath Mahadeshwar) यांच्या गळ्यात (Vandre East Shivsena Candidate) टाकली आहे.

महापौर विश्वनाथ महाडेश्वर यांना वांद्रे पूर्व मतदारसंघातून लढण्यासाठी एबी फॉर्म देण्याचा निर्णय शिवसेना पक्षप्रमुख उद्धव ठाकरे यांनी घेतला. शिवसेना नेते अनिल परब यांनी एबी फॉर्म देतानाचा फोटो शेअर करत सोशल मीडियावरुन याविषयी माहिती दिली.

तृप्ती सावंत यांना पुन्हा संधी देण्यावरुन पक्षामध्ये खलबतं सुरु होती. तृप्ती सावंत यांना उमेदवारी द्यावी की त्यांचं तिकीट कापून महापौर विश्वनाथ महाडेश्वरांना रिंगणात उतरवावं, याविषयी चर्चा झाली. अखेर तृप्ती सावंत यांना डावलून महाडेश्वरांच्या पारड्यात मत (Vandre East Shivsena Candidate) पडलं.

उमेदवारी अर्ज दाखल करण्यासाठी आज (4 ऑक्टोबर) शेवटचा दिवस आहे. त्यामुळे राज्यभरातील उमेदवारांना अर्ज भरण्यासाठी लगबग करावी लागणार आहे. काँग्रेसने वांद्रे पूर्वमधून झिशान सिद्दीकी यांना उमेदवारी दिली आहे.

पोटनिवडणुकीत तृप्ती सावंत विजयी

2014 मध्ये झालेल्या विधानसभा निवडणुकीत प्रकाश (बाळा) सावंत दुसऱ्यांदा आमदारपदी निवडून आले होते. सावंतांनी भाजपच्या कृष्णा पारकर यांचा पराभव केला होता. मात्र 2015 मध्ये सावंत यांचं निधन झाल्यामुळे पोटनिवडणूक जाहीर झाली.

जितेंद्र आव्हाड यांच्याविरोधात शिवसेनेकडून मराठी अभिनेत्रीला उमेदवारी

2014 मधील निवडणुकीनंतर भाजप-सेनेची युती झाल्यामुळे शिवसेनेने प्रकाश सावंत यांची पत्नी तृप्ती सावंत यांनाच उमेदवारी दिली. तर भाजपने उमेदवार न उतरवण्याचा निर्णय घेतला. मात्र नारायण राणे काँग्रेसकडून रिंगणात उतरले होते.

‘मातोश्री’च्या अंगणातील जागा पटकावण्याच्या इरेने उतरलेल्या नारायण राणे यांना पोटनिवडणुकीत पराभवाचा सामना करावा लागला. तृप्ती सावंत पोटनिवडणुकीत जवळपास 20 हजारांच्या मताधिक्याने जिंकून आल्या होत्या.

शिवसेनेची नवी पद्धत

उमदेवारांच्या नावावर शिक्कामोर्तब करण्यासाठी यावर्षी मातोश्रीवर अधिकृत उमेदवारांना पक्षाच्या एबी फॉर्मचे वितरण केले जात आहे. त्यामुळे शिवसेनेतील अनेक इच्छुक मातोश्रीवर येऊन आपले एबी फॉर्म उद्धव ठाकरेंकडून स्वीकारत आहेत.

बंडखोरी टाळण्यासाठी उद्धव ठाकरे यांनी स्वतः उमेदवारांना एबी फॉर्मचं वाटप केलं. जाहीरपणे यादी प्रसिद्ध न करता उमेदवारांना बोलवून त्यांनी एबी फॉर्म दिला. युतीमध्ये शिवसेना 124 जागा लढवणार आहे. पण इच्छुकांची संख्या मोठ्या प्रमाणात आहे. काही ठिकाणचा वाद उद्धव ठाकरे यांनी दोन उमेदवारांना समोरासमोर बसवून सोडवला.

गेल्या काही दिवसांत तिकीट वाटपावरुन शिवसेनेत बराच खल झाला. भांडुप पश्चिमचे विद्यमान आमदार अशोक पाटील यांचा पत्ता कट करत त्यांच्या जागी रमेश कोरगावकर यांना शिवसेनेने उमेदवारी दिली होती. दोन्ही इच्छुक तीन दिवसांपासून ‘मातोश्री’वर तळ ठोकून होते.

याआधी, तिकीटासाठी ‘मातोश्री’वर तळ ठोकणाऱ्या महेश कोठे यांचा पत्ता कट झाला होता. सोलापूर शहर मध्य मतदारसंघातून दिलीप मानेंना उमेदवारी मिळाली आहे. दिलीप माने हे काँग्रेसचे माजी आमदार आहेत.

दुसरीकडे करमाळा विधानसभा मतदारसंघात विद्यमान आमदार नारायण पाटील यांचा पत्ता कट करत शिवसेनेने या मतदारसंघात राष्ट्रवादीतून आलेल्या रश्मी बागल यांना उमेदवारी जाहीर केली. बागलही दोन-तीन दिवस ‘मातोश्री’वर आशेने येत होत्या.