रस्ते बांधकामासाठी 15 लाख कोटी खर्च करणार; नितीन गडकरींची मोठी घोषणा

नवी दिल्ली : केंद्रीय मंत्री नितीन गडकरी (Union Minister Nitin Gadkari) यांनी म्हटलं आहे की, येत्या दोन वर्षांत भारतातील रस्ते बांधकाम अजून पुढे नेण्याचं उद्दीष्ट ठेवून त्यांच्या मंत्रालयाने कामाला सुरुवात केली आहे. रस्ते आणि पायाभूत सुविधांच्या विकासास प्राथमिकता देणे हा उद्देश डोळ्यासमोर ठेवून कामं केली जातील. इंडो-यूएस पार्टनरशिप व्हिजन समिटमध्ये ते बोलत होते. (Nitin Gadkari announced, 15 lakh crores will be spent in road construction)

नितीन गडकरी म्हणाले की, येत्या दोन वर्षात रस्ते वाहतूक आणि महामार्ग मंत्रालयाने (Ministry of Road Transport) पायभूत सुविधांसाठी सुमारे 15 लाख कोटी रुपये खर्च करण्याचे उद्दीष्ट ठेवले आहे. रस्ते आणि महामार्ग क्षेत्रात केंद्राने 100 टक्के थेट परकीय गुंतवणूकीला यापूर्वीच परवानगी दिली आहे, ज्यामुळे उद्दीष्ट साध्य करण्यासाठी आपल्या मंत्रालयाच्या संसाधनांना आणखी चालना मिळेल. त्यांचे मंत्रालय चालू आर्थिक वर्षात आपली कामगिरी सुधारण्यात सक्षम होईल आणि दररोज 40 कि.मी. महामार्ग बांधण्याचे उद्दीष्ट साध्य करेल, असा विश्वास गडकरी यांनी व्यक्त केला आहे.

इंडो-यूएस पार्टनरशिप व्हिजन समिटला संबोधित करताना नितीन गडकरी म्हणाले की, भारतातील पायाभूत सुविधा क्षेत्रात गुंतवणूकीची मोठी संधी आहे. ते म्हणाले, भारत सरकार आपल्या नागरिकांसाठी जागतिक दर्जाच्या पायाभूत सुविधा निर्माण करण्याचे काम करत आहे. महामार्ग, रस्ते आणि बंदरे सुधारण्याचे उद्दीष्ट आहे. NHAI प्रकल्पांमध्ये गुंतवणूक करताना गुंतवणूकदारांना आपली गुंतवणूक हेजिंगद्वारे कव्हर करावी लागेल, अशी माहितीही त्यांनी दिली.

गडकरी म्हणाले की, विमानतळ, मेट्रो रेल्वे, रेल्वे स्थानकांसह पायाभूत सुविधांमध्ये गुंतवणूक करण्याची मोठी संधी आपल्यासमोर आहे. इलेक्ट्रिक पब्लिक ट्रान्सपोर्टमध्येदेखील गुंतवणूक करण्याची संधी आपल्याकडे आहे.

दररोज विक्रमी 37 किमी रस्त्याचे बांधकाम

दररोज 37 किलोमीटर रस्ता तयार होत असताना रस्ते पायाभूत सुविधा वेगाने प्रगती करीत आहेत. राष्ट्रीय महामार्ग प्राधिकरणाने (एनएचएआय) नुकताच अवघ्या 24 तासात 2,580 मीटर लांबीच्या चौपदरी महामार्गाचे बांधकाम करण्याचा विक्रम केला आहे. हा एक जागतिक विक्रम असल्याचे त्यांनी सांगितले.

महामार्गांसाठी 5 पट खर्च

भारताने यावर्षी 20 मार्चपर्यंत 1,37,625 किलोमीटरपर्यंत महामार्गांचे बांधकाम केले आहे. एप्रिल 2014 पर्यंत 91,287 किलोमीटर महामार्गांचे बांधकाम करण्यात आले होते. या कालावधीत भारताने महामार्गांच्या बांधकामासाठी पाचपट जास्त पैसे खर्च केले आहेत. गडकरी म्हणाले की, गेल्या सात वर्षात भारताने राष्ट्रीय महामार्गाची लांबी 50 टक्क्यांनी वाढवली आहे.

अलीकडेच गडकरी यांनी भारतभरातील रस्ते बांधकाम प्रकल्पांमध्ये सहभागी असलेल्या एजन्सींना रस्ते प्रकल्पांना वित्तपुरवठा करण्यासाठी पायाभूत निधी (इन्फ्रास्ट्रक्चर फंड) तयार करण्याचे आवाहन केले.

इतर बातम्या

आता इतर राज्यांमध्ये गाडी घेऊन गेल्यास री-रजिस्ट्रेशन करावं लागणार नाही, सरकारचा नवा प्रस्ताव

रॅश ड्रायव्हिंग करणाऱ्यांना ‘ब्रेक लागणार’, ‘या’ कंपनीची भन्नाट आयडिया

(Nitin Gadkari announced, 15 lakh crores will be spent in road construction)