Tata Nano पेक्षाही छोटी इलेक्ट्रिक कार, एका चार्जमध्ये धावते 290 किमी, किंमत किती?

मोठ्या SUV आणि लांब पल्ल्याच्या इलेक्ट्रिक कारची क्रेझ वाढत असताना, स्मार्ट (smart) या जर्मन कार ब्रँडने आपल्या छोट्या सिटी कारकडे पुन्हा लक्ष वळवले आहे. पॅरिस मोटर शोमध्ये कंपनीने आपल्या लोकप्रिय दोन आसनी कारचे नवे इलेक्ट्रिक रूप Smart #2 सादर केले आहे. शहरातील अरुंद रस्ते आणि पार्किंगची समस्या लक्षात घेऊन ही कार तयार करण्यात आली आहे.

Tata Nano पेक्षाही छोटी

Smart #2 ची लांबी 2746 मिमी, रुंदी 1760 मिमी आणि उंची 1555 मिमी आहे. या कारमध्ये दोन जणांसाठी आसनव्यवस्था देण्यात आली आहे. विशेष म्हणजे, तिची लांबी 3099 मिमी असलेल्या Tata Nano पेक्षाही कमी आहे. या कारचे डिझाइन Mercedes-Benz ने केले आहे.

एका चार्जमध्ये 290 किमीची रेंज

Smart #2 मध्ये 35.8 kWh क्षमतेचा लिथियम आयर्न फॉस्फेट (LFP) बॅटरी पॅक देण्यात आला आहे. कंपनीच्या माहितीनुसार, ही कार एका चार्जमध्ये 290 किमीपर्यंत प्रवास करू शकते. यामध्ये 65 kW DC फास्ट चार्जिंगची सुविधाही आहे. फास्ट चार्जरच्या मदतीने बॅटरी 10 ते 80 टक्क्यांपर्यंत चार्ज करण्यासाठी 20 मिनिटांपेक्षा कमी वेळ लागतो, असा दावा करण्यात आला आहे.

किंमत किती?

जर्मनीमध्ये Smart #2 ची सुरुवातीची किंमत 19990 युरो (सुमारे 21.28 लाख रुपये) ठेवण्यात आली आहे. तर विशेष Couture Edition ची किंमत 25690 युरो (सुमारे 27.35 लाख रुपये) आहे. या किमती जर्मन बाजारासाठी असून, इतर देशांमध्ये आयात शुल्क आणि इतर खर्चांमुळे किंमत वाढू शकते.

28 वर्षांनंतर पुनरागमन

शहरांसाठी छोट्या कार तयार करण्याच्या उद्देशाने स्मार्ट ब्रँडची सुरुवात 1990 च्या दशकात झाली. 2019 मध्ये Mercedes-Benz आणि चीनच्या Geely समूहाने संयुक्त उपक्रम सुरू केला. आता Smart #2 च्या माध्यमातून कंपनी आपल्या दोन आसनी कारच्या परंपरेला इलेक्ट्रिक तंत्रज्ञानाची जोड देत आहे. मात्र, भारतात ही कार कधी दाखल होणार आणि तिची किंमत किती असेल, याबाबत अद्याप अधिकृत माहिती समोर आलेली नाही.