PANCARD: पॅनकार्डसाठी 4 नवीन फॉर्म, मग कोणता भरणार? 93, 94, 95 की 96? समजून घ्या नियम

Pancard New Form 93, 94, 95 and 96: आता 1 एप्रिल 2026 नंतर पॅनकार्ड तयार करायचे असेल तर मोठे बदल झाले आहेत. केंद्र सरकारने जुने अर्ज पद्धती बाद केली आहे. नवीन पॅन कार्ड काढण्यासाठी आता चार नवीन फॉर्म, अर्ज आले आहेत. अर्थात प्रत्येक श्रेणीसाठी वेगळा अर्ज आहे. 93, 94, 95 आणि 96 असे चार अर्ज लागू करण्यात आले आहेत. विविध श्रेणीतील लोकांसाठी पॅनकार्डची प्रक्रिया अत्यंत सोपी आणि सहज झाली आहे. सर्वसामान्य नागरिकांसाठी कोणता अर्ज आहे आणि त्याची प्रक्रिया हे समजून घ्या.

कोणता अर्ज कोणासाठी?

Form 93- हा अर्ज भारतीय नागरिकांसाठी आहे

Form 94- भारतातील नोंदणीकृत कंपन्यांसाठी आणि संस्थासाठी

Form 95- परदेशातील नागरिकांना या अर्जाआधारे पॅनकार्ड काढता येईल

Form 96- परदेशात नोंदणीकृत कंपन्या आणि संस्थांसाठी

यापूर्वी जुन्या पद्धतीत पॅनकार्ड काढण्यासाठी केवळ दोन अर्ज होते. Form 49A हा भारतीय नागरिक आणि कंपन्यांसाठी होता. तर Form 49AA हा परदेशी नागरिक आणि परदेशी कंपन्यांसाठी होता. आता हे दोन्ही अर्ज बाद करण्यात आले आहेत. त्याच्या जागी चार नवीन फॉर्म उपलब्ध करून देण्यात आले आहेत. त्यामुळे प्रक्रिया सुटसुटीत आणि सोपी होईल.

नवीन पॅनकार्डच्या फॉर्ममध्ये मोठे बदल

नवीन पॅनकार्ड फॉर्म हा पूर्वीपेक्षा अधिक सोपा आणि स्पष्ट झाला आहे. प्रत्येक अर्जात केवळ त्या श्रेणीची महत्त्वाचीच माहिती मागवली जाणार आहे. त्यामुळे हा अर्ज भरणे अगदी सोपे होईल. आता प्रत्येक अर्जदाराला मोबाईल क्रमांक आणि ईमेल देणे अनिवार्य करण्यात आले आहे. त्यामुळे अर्जदाराची माहिती लवकर अपडेट केली जाईल. तर फोटोची साईजही वाढवण्यात आली आहे. त्यामुळे नागरिकांना आणि संस्थांना मनस्ताप होणार नाही.

या अर्जप्रणालीत काय काय बदल?

भारतीय अर्जदारांसाठी काही खास बदल करण्यात आले आहेत.

अर्जदाराला आता संपूर्ण नाव लिहावे लागेल.

आधारकार्डवरील नावाशी हे नामसाधर्म्य असणे आवश्यक आहे.

नागरिकांना त्यांचा कायमचा पत्ताही नोंदवावा लागेल.

पॅन कार्ड आता कार्यालयीन पत्त्यावरही मागवता येईल.

त्यासाठी अतिरिक्त पुरावा मात्र जोडावा लागेल.