‘या’ ऑनलाईन शॉपिंग साईटवर ऑर्डर केला लॅपटॉप, मात्र पार्सल मिळाल्यानंतर ग्राहक हैराण
चिन्मयाने हा लॅपटॉप आपल्या मित्रासाठी ऑर्डर केला होता. ऑनलाईन फसवणूक झाल्यानंतर चिन्मयाने ट्विटवर ट्विट करत या घटनेची माहिती दिली आहे.
मंगलोर : आजकाल ऑनलाईन फसवणुकीच्या गुन्ह्यांमध्ये मोठ्या प्रमाणावर वाढ झाली आहे. दुकानात गर्दी उभे राहण्यापेक्षा घरबसल्या ऑनलाईन शॉपिंग करण्याचा ट्रेंड (Online Shopping Trend) अधिक वाढला आहे. याचाच गैरफायदा सायबर गुन्हेगार घेत आहेत. मंगलोरमध्ये ऑलनाईन फसवणुकीची (Online Fraud) अशीच एक घटना उघडकीस आली आहे. एका व्यक्तीने फ्लिपकार्ट या ऑनलाईन शॉपिंग साईटवर (Flipkart Online Shopping Site) गेमिंग लॅपटॉप ऑर्डर केला होता. मात्र प्रत्यक्ष जेव्हा ऑर्डरची डिलिव्हरी झाली तेव्हा बॉक्समध्ये लॅपटॉपऐवजी दगड निघाला.
सध्या दिवाळी सण सुरु असल्याने ऑनलाईन शॉपिंग साईटवरही फेस्टिव्ह सिझन सुरु आहे. ऑनलाईन शॉपिंग साईट अमेझॉनवरही सध्या बिग दिवाली सेल सुरु आहे.
गेमिंग लॅपटॉप ऑर्डर केला होता
कर्नाटकमधील मंगलोरमधील रहिवासी असलेले चिन्मया नामक व्यक्तीने Flipkart Big Diwali Sale मध्ये एक गेमिंग लॅपटॉप ऑर्डर केला होता. मात्र जेव्हा ऑर्डर डिलिव्हर झाली आणि बॉक्स उघडून पाहिला तेव्हा आत एक मोठा दगड आणि कॉम्प्युटरचे जुने पार्ट्स आढळले.
पीडिताने ट्विट करत दिली फसवणुकीची माहिती
चिन्मयाने हा लॅपटॉप आपल्या मित्रासाठी ऑर्डर केला होता. ऑनलाईन फसवणूक झाल्यानंतर चिन्मयाने ट्विटवर ट्विट करत या घटनेची माहिती दिली आहे. चिन्मयाने दिलेल्या माहितीनुसार हे फ्लिपकार्ट प्लस अॅश्युअर्ड उत्पादन होते पण तरीही या उत्पादनासोबत ओपन बॉक्स डिलिव्हरी पर्याय उपलब्ध नव्हता.
बॉक्स बाहेरून चांगला दिसत होता. त्यामुळे पीडित व्यक्तीने डिलिव्हरी करण्यासाठी आलेल्या व्यक्तीला ओटीपी सांगितला. बॉक्स उघडताच आसूसचा बॉक्स ओपन होता. तसेच बारकोड आणि प्रोडक्ट डील काढल्याचे दिसून आले.
पीडिताची रिटर्न रिक्वेस्ट अमान्य
आसुस बॉक्स ओपन करुन पाहिले असता बॉक्समध्ये काही जुने कॉम्प्युटर पार्ट्स आणि दगड यासह ई-वेस्ट होते. बॉक्समध्ये दगड सापडल्यानंतर पीडिताने रिटर्नची रिक्वेस्ट टाकली, मात्र सेलरने ती मान्य केली नाही. फ्लिपकार्टने जेव्हा सेलरशी याबाबत संपर्क साधला तेव्हा सेलरने आपण योग्य प्रोडक्ट पाठवल्याचे सांगितले.
