रानात जळण आणायला गेली होती महिला, काही वेळाने मृतावस्थेत आढळली !

कराड / दिनकर थोरात : जंगलात जळण आणायला गेलेल्या महिलेची अज्ञात इसमाने दगडाने ठेचून हत्या केल्याची घटना घडली. कराड तालुक्यातील वनवासमाची येथे मंगळवारी रात्री ही घटना घडली आहे. लता चव्हाण असे हत्या करण्यात आलेल्या आरोपीचे नाव आहे. याप्रकरणी तळबीड पोलीस ठाण्यात हत्येचा गुन्हा दाखल करण्यात आला आहे. पोलीस संशयित आरोपीचा शोध घेत आहेत. लता यांची हत्या कुणी आणि कोणत्या कारणातून केली याबाबत पोलीस तपास करत आहेत. तपासाअंती सत्य समोर येईल.

जळण आणायला गेली असता हत्या

लता चव्हाण या मंगळवारी दुपारी जळण आणायला गावाशेजारी जंगलात गेल्या होत्या. त्यांची मुले शेणोली येथे अकलाईदेवी यात्रेला गेली होती. मुले घरी परत आल्यावर त्यांनी आईचा शोध घेतला. मात्र, ती सापडली नाही. दरम्यान, गावातील काही लोकांनी लता यांना जळण आणायला जाताना पाहिले होते. त्यानुसार पोलिसांनी शोध घेतला असता लता यांचा निर्जनस्थळी मृतदेह आढळून आला.

आरोपीच्या अटकेसाठी पोलिसांची छापेमारी सुरु

प्राथमिक तपासात लता यांचा गळा आवळून आणि दगडाने ठेचून हत्या केल्याचे निष्पन्न झाले. अत्यंत निर्घृण पद्धतीने लता यांची हत्या करण्यात आली. तळबीड पोलिसांत गुन्हा दाखल झाला असून, संशयिताच्या शोधासाठी पोलिसांनी छापेमारी सुरू केली आहे.