मद्यपी तरुणाकडून डॉक्टरला मारहाण, घटना सीसीटीव्ही कॅमेऱ्यात कैद

कल्याण / सुनील जाधव : डॉक्टरकडे उपचारासाठी गेला असता दारु प्यायला का विचारले म्हणून तरुणाने डॉक्टरला बेदम मारहाण केल्याची घटना कल्याणजवळील आंबिवली येथे घडली आहे. मारहाणीची घटना सीसीटीव्ही कॅमेऱ्यात कैद झाली आहे. याप्रकरणी खडकपाडा पोलीस ठाण्यात अदखलपात्र गुन्हा दाखल करण्यात आला आहे. नितीन प्रजापती असे मारहाण झालेल्या डॉक्टरचे नाव आहे. तर प्रथमेश पाटील आणि नंदकुमार पाटील अशी मारहाण करणाऱ्या आरोपींची नावे आहेत.

रंगपंचमी करताना पायाला दुखापत झाली

कल्याण अंबिवली अटाळी गावात काल रंगपंचमी खेळत असताना एका तरुणाला पायाला काच लागली. यामुळे हा तरुण पायाला मलमपट्टी करण्यासाठी डॉ. नितीन प्रजापती यांच्या गुरुकृपा क्लिनिकमध्ये गेला. यावेळी तरुण मद्यधुंद अवस्थेत होता. त्याची अवस्था पाहून डॉक्टरने त्याला दारु प्यायला का असे विचारले.

दोघांनी डॉक्टरला मारहाण केली

दारु प्यायला विचारल्याने तरुण संतापला आणि त्याच्या मित्राने डॉक्टरशी हुज्जत घालत मारहाण केली. याप्रकरणी आरोपी तरुणांविरोधात खडकपाडा पोलीस ठाण्यात अदखलपात्र गुन्हा दाखल करण्यात आला आहे. मारहाण करणाऱ्या तरुणांना अटक करा अन्यथा आंबिवली परिसरातील क्लिनिक बंद ठेवण्याचा इशारा डॉक्टर संघटनेने दिला आहे.