Chhatrapati Sambhajinagar : भाजप इच्छुक आक्रमक, तिकीट वाटपावर तीव्र आक्षेप; मंत्र्यांच्या PA अन् नातेवाईकाला उमेदवारी!

छत्रपती संभाजीनगर येथे स्थानिक निवडणुकीच्या तिकीट वाटपावरून भारतीय जनता पक्षात अंतर्गत वाद निर्माण झाला आहे. प्रशांत बदाणे पाटील या भाजप कार्यकर्त्याला तिकीट नाकारण्यात आल्याने त्यांनी तीव्र संताप व्यक्त केला आहे. बदाणे पाटील यांचा दावा आहे की, पक्षाने केलेल्या सर्वेक्षणानुसार त्यांना 70 टक्के लोकांचा पाठिंबा होता, तर अन्य उमेदवारांचे प्रमाण खूपच कमी होते. बदाणे पाटील यांनी आरोप केला आहे की, पालकमंत्री अतुल सावे यांच्या पीएच्या पत्नीला आणि डॉ. कराड यांच्या नातेवाईक सागर पाले यांना तिकीट देण्यात आले, ज्यांचे सर्वेमधील प्रमाण अनुक्रमे 3 ते 6 टक्के आणि 10 टक्के होते. 25 वर्षांपासून पक्षासाठी काम करत असूनही आपल्याला डावलण्यात आल्याचे त्यांचे म्हणणे आहे. त्यांनी पक्षाचे शिस्त मोडली नसून, पक्षानेच शिस्त मोडल्याचा पलटवार केला आहे. त्यांनी मुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांच्याकडे हस्तक्षेप करून आपल्याला सी-फॉर्म देण्याची मागणी केली आहे.