मुंबईसह बारामतीतही पोलिसांवर दबाव? रोहित पवारांचा खळबळजनक दावा

राष्ट्रवादी काँग्रेसचे नेते रोहित पवार यांनी अजित पवार यांच्याशी संबंधित विमान अपघाताच्या चौकशीच्या पद्धतीवर गंभीर प्रश्नचिन्ह उपस्थित केले आहे. अपघातानंतर 27 दिवस उलटूनही अद्याप एफआयआर (FIR) दाखल करण्यात आला नसल्याने त्यांनी तीव्र नाराजी व्यक्त केली आहे. मुंबईतील पोलिसांवर जसा दबाव असतो, तसाच दबाव बारामतीतही दिसत असल्याचा आरोप त्यांनी केला.

पवार यांनी डीजीसीए (DGCA) द्वारे सुरु असलेल्या तांत्रिक तपासावरही आक्षेप घेतला. डीजीसीए फक्त तांत्रिक बाबी तपासते, गुन्हेगारी पैलूंकडे लक्ष देत नाही. त्यामुळे या घटनेचा सखोल गुन्हेगारी तपास (Criminal Investigation) होणे गरजेचे आहे, अशी त्यांची मागणी आहे. झारखंडमधील रेडबर्ड कंपनीच्या विमानाला अपघात झाल्यावर तातडीने कारवाई झाली, पण या प्रकरणात मात्र एफआयआर नाही, यावर त्यांनी आश्चर्य व्यक्त केले. पोलीस प्रशासनावर विशिष्ट प्रकारचा दबाव असून, कोणाला तरी वाचवण्याचा प्रयत्न होत असल्याचा संशय त्यांनी व्यक्त केला. एफआयआर दाखल न झाल्यास आपण स्वतः न्यायासाठी लढण्यास तयार असल्याचेही त्यांनी नमूद केले.