महाराष्ट्र महानगरपालिका निवडणूक 2026

महाराष्ट्रात एकूण 29 महापालिका आहेत. यात जालना महापालिका ही सर्वात नवीन महापालिका आहे. लोकसंख्येच्या आधारे महापालिकांची चार गटात विभागणी करण्यात आली आहे. अ ते ड पर्यंत ही वर्गवारी आहे. एक कोटी लोकसंख्या असलेल्या महापालिकेचा समावेश अ गटात करण्यात आला आहे. तर अ प्लस ग्रेड असलेल्या महापालिकेच्या यादीत केवळ मुंबई महापालिका आहे. मुंबई महापालिका ही देशातील सर्वात श्रीमंत महापालिका आहे. मुंबई, ठाणे, नवी मुंबई, उल्हासनगर, कल्याण डोंबिवली, भिवंडी निजामपूर, मिरा भाईंदर, वसई विरार, पनवेल, नाशिक, अहिल्यानगर, जळगाव, धुळे, मालेगाव, पुणे, पिंपरी चिंचवड, सोलापूर, कोल्हापूर, इचलकरंजी, सांगली-मिरज-कुपवाडा, छत्रपती संभाजीनगर, नांदेड-वाघाळा, परभणी, जालना, लातूर, अमरावती, अकोला, नागपूर आणि चंद्रपूर आदी 29 महापालिकांच्या निवडणुका घोषित करण्यात आल्या आहेत. 15 जानेवारी 2026 रोजी या महापालिकांसाठी मतदान होणार असून 16 जानेवारी 2026 रोजी निकाल लागणार आहे. एकूण 2 हजार 869 जागांसाठी या निवडणुका होत आहेत.