गडद अंधारात हल्ला, हात-पाय बांधून मारहाण, नंदुरबारमध्ये 20 लाखांचा दरोडा

या दरोड्यामध्ये कपड्यांच्या 128 गठाणांसह सुमारे 20 लाखांचा मुद्देमाल लुटण्यात आला. दरोडेखोरांनी आयसर गाडीला थांबवून चालकाचे हातपाय बांधत ही लूट केलीय. यामध्ये दरोडेखोरांनी आयसर चालकासह इतर दोघांना मारहाण केलीआहे. नंदुरबार वाका चार रस्त्यावर ही घटना घडली.

NANDURBAR POLICE

Reporter Jitendra Baisane | Updated on: Aug 21, 2021 | 5:54 PM

नंदुरबार : गुजरात राज्यातून व्यापार करण्यासाठी कपडे घेऊन येणाऱ्या वाहनचालकाला तसेच मालकाला मारहाण करत लुटमार करण्यात आली आहे. या दरोड्यामध्ये कपड्यांच्या 128 गठाणांसह सुमारे 20 लाखांचा मुद्देमाल लुटण्यात आला. दरोडेखोरांनी आयसर गाडीला थांबवून चालकाचे हातपाय बांधत ही लूट केलीय. यामध्ये दरोडेखोरांनी आयसर चालकासह इतर दोघांना मारहाण केलीआहे. नंदुरबार वाका चार रस्त्यावर ही घटना घडली. (driver and owner carrying clothes from Gujarat has been beaten and robbed in nandurbar)

अहमदाबादहून अमरावतीकडे येताना हल्ला

मिळालेल्या माहितीनुसार जळगाव जिल्ह्यातील म्हसवे येथील रहिवाशी किशोर संतोष पाटील हे आपले आयसर ट्रक घेऊन अहमदाबाद येथून कापडाचे गठाण भरुन अमरावतीकडे निघाले होते. यावेळी रात्री 1 वाजेच्या सुमारास त्यांच्यासमोर एक अज्ञात ट्रक येऊन उभा राहिला. त्यांतर ट्रकमधील एकाने आयसर चालक संजय मच्छिंद्र पाटील यांच्या हात तसेच खांद्यावर मारहाण केली. त्याचबरोबर गाडी मालक किशोर संतोष पाटील यांचेही हातपाय बांधून त्यांना मारहाण करण्यात आली.

वाहन चालकासह मालकालाही मारहाण

त्यानंतर चार दरोडेखोरांपैकी एकाने आयसर गाडी अज्ञात ठिकाणी नेली. गाडीला अज्ञात ठिकाणी नेऊन त्यांनी जबरी लूट केली. यामध्ये जवळपास 20 लाखांचा मुद्देमाल लुटण्यात आला. नंदुरबार वाका चार रस्त्यावर वाहनचालकासह मालकालाही मारहाण करण्यात आली. त्यानंतर लूट करणारे चौघेही मुद्देमाल घेऊन पसार झाले.