Vasai Theft : वसईत महागड्या सायकल चोरणारी टोळी जेरबंद; आरोपींकडून 25 सायकल जप्त
सोसायटीतील सीसीटीव्ही फुटेज, मोबाईल टॉवर लोकेशन, तांत्रिक बाबींचा आधार घेत पोलिसांनी तपास सुरु केला. तपासाअंती या गुन्ह्यांची उकल झाली आहे.
वसई : वसई, विरार, नालासोपारा परिसरातून महागड्या सायकल चोरी (Cycle Theft) करणाऱ्या टोळीचा वसई पोलिसांनी भांडाफोड केला आहे. या टोळीतील 4 आरोपींना बेड्या ठोकल्या (Arrest) आहेत. अंश माताप्रसाद जयस्वाल (36), मखंचू रामगोपाल कानोजिया (30), विजयकुमार घनश्याम गुप्ता (33), महेंद्र खिनीलाल सरोज (37) अशी अटक केलेल्या आरोपींची नावे आहेत. हे सर्वजण वसईच्या वालीव, भोयदापाडा परिसरातील असून मूळचे उत्तरप्रदेशचे रहिवासी आहेत. आरोपींकडून 89 हजार 400 रुपये किमतीच्या 25 सायकल जप्त (Seized) केल्या आहेत. सध्या हे चारही आरोपी वसई पोलिसांच्या ताब्यात आहेत. प्रत्येक गुन्ह्यात आरोपींची पोलीस कोठडी घेऊन तपास सुरू असल्याची माहिती वसईचे वरिष्ठ पोलीस निरीक्षक कल्याणराव करपे यांनी सांगितले.
चोरीच्या घटनांत वाढ झाल्याने पोलिस पथकाने तपास सुरु केला
आरोपींचे वसईतील वालीवमध्ये गॅरेज आहे. वसई पोलीस ठाणे हद्दीत महागड्या सायकल चोरीच्या घटना वाढल्या होत्या. परिमंडळ 2 चे पोलीस उपायुक्त संजय पाटील यांच्या मार्गदर्शनाखाली वसईचे वरिष्ठ पोलीस निरीक्षक कल्याणराव करपे यांनी गुन्हे शाखेचे पोलीस निरीक्षक ऋषिकेश पवळ यांच्या नेतृत्वाखाली एपीआय राम सुरवसे, सुनील पवार, पीएसआय विष्णू वाघमोडे, पोलीस हवालदार सुनील मवालकर, पोलीस कॉन्स्टेबल अमोल पाटील, सूर्यकांत मुंढे, राजेंद्र जाधव, शरद पाटील, अक्षय नांदगावकर यांचे स्वतंत्र पथक बनवून तपासाला सुरवात केली होती.
सीसीटीव्ही आणि तांत्रिक बाबींचा तपास करत आरोपींच्या मुसक्या आवळल्या
सोसायटीतील सीसीटीव्ही फुटेज, मोबाईल टॉवर लोकेशन, तांत्रिक बाबींचा आधार घेत पोलिसांनी तपास सुरु केला. तपासाअंती या गुन्ह्यांची उकल झाली आहे. सोसायटी, मोकळे मैदान, बंगले यामध्ये लावलेल्या सायकलची यातील एक चोरटा रेखी करायचा, दुसरे दोघे जण सायकल चोरी करून गॅरेजमध्ये नेऊन ठेवायचे आणि चौथा त्या सायकल विक्री करायचा. 15 ते 20 हजाराची सायकल 5 ते 6 हजारात विकून पैसे मिळवायचे. या चोरट्याने वसई पोलीस ठाण्यातील 8 गुन्ह्याची कबुली दिली आहे. आरोपींनी वसई विरार नालासोपारा परिसरात कुठे कुठे चोरी केल्या आहेत, याचा आम्ही तपास करीत आहेत अशी माहिती वसईचे वरिष्ठ पोलीस निरीक्षक कल्याणराव करपे यांनी दिली. (Expensive bicycle stealing gang arrested in Vasai, 25 bicycles seized from the accused)
