देवदर्शनासाठी चालले होते कुटुंबीय, अचानक रानडुकरांनी रिक्षावर हल्ला केला, मग…

पुणे / विनय जगताप : रानडुकरांनी रिक्षावर केलेल्या हल्ल्यात रिक्षा 300 फूट खोल दरीत कोसळून 1 जण ठार, तर 3 जण जखमी झाल्याची घटना घडली. पुण्याच्या वेल्हा तालुक्यातील वरघड गावाच्या हद्दीत ही घटना घडली आहे. देवदर्शनासाठी जात असताना ही घटना घडली. घटनेनंतर स्थानिकांनी मृत व्यक्ती आणि जखमींना खोल दरीतून बाहेर काढलं. मृत व्यक्तीच्या कुटुंबियांना आणि जखमींना वनविभागाने तातडीने मदत करावी, अशी मागणी स्थानिकांनी केली आहे.

देवदर्शनासाठी जात असताना रानडुकरांनी रिक्षावर केला हल्ला

वेल्हे तालुक्यातील दुर्गम भाग असलेल्या वरघड येथील जोगोबा देवाच्या दर्शनासाठी पीडित कुटुंब चालले होते. यावेळी त्यांच्या रिक्षावर उन्मत रानडुकरांनी अचानक हल्ला केला. यात रिक्षा 300 फूट दरीत कोसळल्याने यात काकाचा जागीच मृत्यू झाला तर पुतण्या गंभीर जखमी झाला आहे. कुटुंबातील अन्य दोन सदस्य किरकोळ जखमी झाले आहेत.

स्थानिक रेस्क्यू टीमने मयत आणि जखमींना काढले बाहेर

घटनेची माहिती मिळताच स्थानिक रेस्क्यू पथकाचे तानाजी भोसले, मारूती मरगळे, सुनिल मरगळे, नितीन ढेबे, संतोष साळेकर यांनी खोल दरीतून मृतदेह आणि जखमींना बाहेर काढले. मयत आणि जखमींना वनविभागाने मदत द्यावी अशी मागणी सामाजिक कार्यकर्ते मारूती मरगळे आणि स्थानिकांनी केली आहे.