संतापजनक ! पत्नी आत्महत्या करत होती, पती व्हिडिओ बनवत होता; कारण काय?

कानपूर : उत्तर प्रदेशातील कानपूरमध्ये (Kanpur Uttar Pradesh) एक संतापजनक घटना उघडकीस आली आहे. पत्नी पंख्याला गळफास घेत आत्महत्या (Suicide) करत होती. यावेळी पतीने तिला वाचवायचे सोडून आत्महत्येचा व्हिडिओ करत (Shoot Suicide Video) होता. पतीचे कारनामे ऐकून संपूर्ण शहरात खळबळ उडाली आहे. शोभिता गुप्ता असे मयत पत्नीचे नाव आहे, तर संजीव गुप्ता असे व्हिडिओ काढणाऱ्या पतीचे नाव आहे.

4 वर्षांपूर्वीच झाला होता विवाह

कानपूरमधील किदवई नगर येथील शोभिता हिचा गुलमोहर नगरमध्ये राहणाऱ्या संजीवसोबत 4 वर्षापूर्वी विवाह झाला होता. शोभिताने हे टोकाचे पाऊल नेमके कोणत्या कारणातून उचलले हे कळू शकले नाही.

पत्नी गळफास घेत होती पती व्हिडिओ बनवत होता

मंगळवारी दुपारी शोभिताने आपल्या राहत्या घरी गळफास घेत आत्महत्या केली. यावेळी तिचा पती संजीवही तेथे उपस्थित होता. मात्र त्याने पत्नीला वाचवण्याचा प्रयत्न केला नाही. उलट पत्नीचा आत्महत्या करताना व्हिडिओ मोबाईलमध्ये बनवला.

पत्नीच्या आत्महत्येनंतर तिच्या घरच्यांना कळवले

शोभिताने आत्महत्या केल्यानंतर संजीवने याची माहिती तिच्या घरच्यांना दिली. मुलीच्या आत्महत्येची माहिती मिळतात शोभिताचे घरचे तिच्या घरी दाखल झाले. माहेरचे लोक घरी आले तेव्हा संजीव पत्नीला रुग्णालयात नेण्याऐवजी तिथेच तिला पंपिंग करत होता, असे महिलेच्या वडिलांनी सांगितले.

शोभिताच्या माहेरच्यांनी तिला रुग्णालयात नेले असता डॉक्टरांनी तिला मृत घोषित केले. नातेवाईकांनी स्थानिक पोलिसांना या घटनेची माहिती दिली. पोलिसांनी तात्काळ घटनास्थळी धाव पंचनामा करत मृतदेह शवविच्छेदनासाठी पाठवला.

पत्नीच्या घरच्यांना आत्महत्या करतानाचा व्हिडिओ दाखवला

मुलीच्या घरी पोहताच वडिलांनी हे कसे घडले असे जावयाला विचारले. तेव्हा जावयाने मोबाईलमधील आत्महत्या करतानाचा व्हिडिओ तिच्या घरच्यांना दाखवला. व्हिडिओ पाहून महिलेच्या घरचे हैराण झाले.

याप्रकरणी पोलीस तपास करत आहेत. शोभिताने कोणत्या कारणातून आत्महत्येसारखे टोकाचे पाऊल उचलले हे तपासानंतरच स्पष्ट होईल. पोलीस कसून तपास करत आहेत.