आधी चर्चा, नंतर फूल प्लॅनिंग, मगच अमृता फडणवीस यांना ब्लॅकमेल केलं जायचं; धक्कादायक खुलाश्याने पोलीसही चक्रावले

मुंबई : राज्याचे उपमुख्यमंत्री देवेंद्र फडणवीस यांच्या पत्नी अमृता फडणवीस यांना ब्लॅकमेल करण्यात आल्याच्या प्रकरणात सट्टेबाज अनिल जयसिंघानी आणि त्याची मुलगी अनिक्षा जयसिंघानी हिला पोलिसांनी अटक केली आहे. या दोघांकडून पोलिसांना धक्कादायक माहितीही मिळाली आहे. अमृता फडणवीस यांना ब्लॅकमेल करण्यापूर्वी हे दोन्ही बापलेक प्रॉपर चर्चा करायचे. अनिक्षा ही वडील अनिल जयसिंघानी यांच्याशी चर्चा करायची. कशा पद्धतीने ब्लॅकमेल करायचं हे ठरलं जायचं. मेसेज कसे पाठवायचे? त्यात काय लिहायचं? कोणत्या नंबरहून पाठवायचे? त्यानंतर काय करायचं हे सर्व ठरलं जायचं. ही प्लॅनिंग झाल्यानंतरच अमृता फडणवीस यांना मेसेज पाठवून ब्लॅकमेल केलं जायचं असं पोलीस सूत्रांनी सांगितलं.

अमृता फडणवीस यांना व्हॉट्सअपवर व्हिडीओ किंवा मेसेज पाठवण्यापूर्वी अनिक्षा ही अनिल जयसिंघानी याच्याशी चर्चा करायची. चर्चेतून मजकूर ठरायचा. त्यानंतरच अमृता फडणवीस यांना मेसेज केला जायचा, असं पोलीस सूत्रांनी सांगितलं. पोलिसांनी अनिल आणि अनिक्षा यांची कसून चौकशी केली. त्यात या दोघांनी ही कबुली दिल्याचं सांगितलं जात आहे. पोलिसांना एका मोबाईलमध्ये अमृता फडणवीस यांना पाठवण्यात येणाऱ्या मेसेजचे स्क्रिनशॉट मिळाले आहेत. या दरम्यान दोघांची खूप चर्चा झाल्याचं दिसून येतं. अमृता फडणवीस यांना फसवण्याच्या उद्देशानेच हे कृत्य केल्याचं स्पष्ट होत असल्याचं पोलीस सूत्रांचं म्हणणं आहे.

एक कोटीच्या लाचेची ऑफर

अमृता फडणवीस यांना ब्लॅकमेल केल्याचा अनिक्षावर आरोप आहे. 16 मार्च रोजी अमृता फडणवीस यांनी या प्रकरणी तक्रार केल्यानंतर अनिक्षाला अटक करण्यात आली. त्यानंतर तिच्या वडिलांनाही पोलिसांनी गुजरामधून अटक केली. अनिक्षाने अमृता यांना एक कोटीची लाच देण्याची ऑफर दिली होती. त्याबदल्यात आपल्या वडिलांवरील केसेस मागे घेण्याची विनंती तिने केली होती. मात्र, अमृता फडणवीस यांनी त्यास नकार दिल्याने तिने अमृता फडणवीस यांना ब्लॅकमेल करण्यास सुरुवात केली.

पोलिसांना खोटं सांगितलं

अमृता यांनी अनिक्षाचा नंबर ब्लॉक केला होता. त्यानंतर अनिल जयसिंघानी यांनी अमृता यांना धमकावणारे कथित मेसेज पाठवले होते. या मेसेजमधून त्यांनी अमृता यांना ब्लॅकमेल करण्याचा प्रयत्नही केला होता. सुरुवातीला अनिक्षाने या प्रकरणात फक्त दोन लोकांची नावे घेतली होती. नंतर चौकशी केली असता ती पोलिसांची दिशाभूल करत असल्याचं उघड झालं. अमृता फडणवीस यांना तिने आपण फॅशन डिझायनर असल्याचं म्हटलं होतं. आता मात्र, कायद्याची विद्यार्थी असल्याचं ती म्हणत असल्याचं पोलिसांनी सांगितलं.

चौकशी सुरू

सहानुभूती मिळवण्यासाठी आपल्या व्यवसायाच्याबाबत अनिक्षा खोटं बोलत असावी, असं पोलिसांना वाटतंय. पोलिसांनी अनिक्षाच्या घरातून डिझायनिंगचे कपडे आणि दागिन्यासहीत इतर सामान जप्त केलं आहे. तिने या वस्तू कुठून घेतल्या याची पोलीस चौकशी करत आहे. अनिक्षाचे नातेवाईक निर्मल जयसिंघानी हे सुद्धा या प्रकरणात आरोपी आहेत. त्यांचे रेडीमेड कपड्यांचे दुकान आहे. मात्र, ते डिझायनर कपडे विकत नाहीत.