16 वर्षीय मुलीवर बलात्कार करुन पोलिसांना महिनाभर चकवा, हनी ट्रॅपच्या माध्यमातून नराधमाला बेड्या
अल्पवयीन मुलीवर बलत्कार करून फरार झालेल्या वासनांध आरोपीला हनी ट्रॅप लावून अटक करण्यात तुळींज पोलिसांना यश आले आहे. सुरज सारसद असे आरोपीचे नाव असून तो 24 वर्षांचा आहे.
नालासोपारा (पालघर) : अल्पवयीन मुलीवर बलत्कार करून फरार झालेल्या वासनांध आरोपीला हनी ट्रॅप लावून अटक करण्यात तुळींज पोलिसांना यश आले आहे. सुरज सारसद असे आरोपीचे नाव असून तो 24 वर्षांचा आहे. आरोपीने पोलिसांना खूप चकवा दिला. पण अखेर हनी ट्रॅपच्या माध्यमातून तो पोलिसांच्या जाळ्यात अडकला. पोलिसांनी आरोपीला घटनेनंतर जवळपास एक महिन्यांनी बेड्या ठोकल्या आहेत.
नेमकं प्रकरण काय?
आरोपा सुरज सारसद हा 16 वर्षीय अल्पवयीन मुलीवर एक महिन्यांपूर्वी बलात्कार करुन फरार झाला होता. याबाबत तुळींज पोलीस ठाण्यात गुन्हा दाखल करण्यात आला होता. तसेच पोलिसांकडून आरोपीचा शोध घेणे सुरु होते. विशेष म्हणजे आरोपी इतका चालाख होता की तो वारंवार आपला मोबाईल नंबर बदलत होता. तसेच तो वेळोवेळी जागा बदलत फिरत होता. त्यामुळे त्याला पकडणं हे पोलिसांसमोर एक आव्हान बनलं होतं. पण अखेर त्याच्या मुसक्या आवळण्यात पोलिसांना यश आलं आहे.
तुळींजचे वरिष्ठ पोलीस निरीक्षक राजेंद्र कांबळे यांनी वरिष्ठांच्या मार्गदर्शनाखाली पोलीस उपनिरीक्षक मल्हार थोरात, पोलीस नायक जावेद तडवी, मध्यवर्ती गुन्हे शाखेचे कर्मचारी पोलीस नायक राजाराम काळे यांची स्वतंत्र टीम आरोपीच्या शोधासाठी नियुक्त केली होती. ही टीम दिवसरात्र आरोपीला पकडण्यासाठी झटत होती.
पोलिसांनी आरोपीला कसं पकडलं?
तापासा दरम्यान पोलिसांच्या हाती महत्त्वाची माहिती लागली. एका गुप्त बातमीदाराने आरोपीबाबत महत्त्वाची माहिती दिली. आरोपी जरी मोबाईल नंबर बदलत असला तरी त्याचा व्हाट्सअॅप नंबर हा सुरु आहे, अशी माहिती गुप्त बातमीदाराकडून पोलिसांना मिळाली. आरोपीची गुन्हे करण्याची प्रक्रिया माहीत असल्याने एका पोलीस महिला मित्रच्या माध्यमातून हनी ट्रॅप लावून, काल (23 सप्टेंबर) ठाणे येुथील आनंद नगर येथे आरोपीच्या मुसक्या आवळण्यात पोलिसांना यश आले आहे. आरोपीला पकडण्यासाठी पीएसआय मल्हार थोरात यांच्या टीमने महिला पोलीस मित्रासोबत अक्षरश: बस, रिक्षा, पायी प्रवास करुन आरोपीपर्यंत पोहचले आहेत. एक गुन्हा करून, दुसऱ्या गुन्ह्याच्या तयारीत असताना आरोपीच्या मुसक्या आवळल्याने पोलिसांच्या कामगिरीवर समाधान व्यक्त होत आहे.
राज्यात बलात्काराच्या घटनांमध्ये प्रचंड वाढ
राज्यात बलात्काराच्या घटना सातत्याने घडताना दिसत आहेत. राज्याची राजधानी असलेल्या मुबंई शहराच्या अवघ्या काही अंतरावर असलेल्या डोंबिवलीत अल्पवयीन मुलीवर 31 जणांकडून सामूहिक बलात्कार झाल्याची संतापजनक घटना समोर आली आहे. या घटनेप्रकरणी पोलिसांनी काही आरोपींना बेड्या ठोकल्या आहेत. पण या घटनेमुळे महिला अत्याचाराच्या घटनांवर आळा घालण्यासाठी काहीतरी कठोर पाऊल उचलण्याची गरज असल्याचं अधोरेखित केलं आहे.
महाबळेश्वरमध्ये अल्पवयीन मुलीवर बलत्कार
दुसरीकडे सातारा जिल्ह्यातील महाबळेश्वर परिसरात राहणाऱ्या एका अल्पवयीन मुलीने बाळाला जन्म दिल्याचा धक्कादायक प्रकार समोर आला आहे. या प्रकरणी सागर उर्फ आबा हनुमंत गायकवाड (वय -30 वर्ष) आणि आशुतोष मोहन बिरामणे (रा. महाबळेश्वर) यांना ताब्यात घेत पोलिसांनी गुन्हा दाखल केला होता.
शिवसेना नेत्याची दोन मुलं
या दोघांना सातारा येथील जिल्हा विशेष सत्र न्यायालयाकडून 27 सप्टेंबरपर्यंत पोलीस कोठडी सुनावण्यात आली आहे. तर गुरुवारी या प्रकरणात सहभागी असलेल्या आणखी 11 जणांविरुद्ध गुन्हा दाखल करण्यात आला आहे. यामध्ये महाबळेश्वर नगरीचे माजी नगराध्यक्ष आणि शिवसेनेचे नेते डी. एम. बावळेकर यांचे दोन सुपुत्र सनी बावळेकर आणि योगेश बावळेकर यांचादेखील समावेश असल्यामुळे महाबळेश्वरमध्ये खळबळ उडाली आहे.
हेही वाचा :
साहिल खानला अटक करा, बॉडी बिल्डर मनोज पाटीलची समर्थकांसह पोलिस स्टेशनला धडक
