डिट्टो दृश्यम ! आधी सीनिअरची हत्या केली नंतर मृतदेह लपवून वर टाकली फरशी.. त्याने असं का केलं ?
आरके पुरम भागातील एका सीनिअर सर्व्हेअरच्या मृत्यूसंदर्भात मोठा खुलासा झाला आहे. त्याची हत्या करून मृतदेह लपवण्यात आल्याचे समोर आले आहे. कोणी आणि का केली त्याची हत्या ?
नवी दिल्ली | 20 सप्टेंबर 2023 : अजय देवगणची प्रमुख भूमिका असलेला ‘दृश्यम’ (Drishaym movie) चित्रपट तर सर्वांनाच माहीत आहे. बऱ्याच जणांचा तो आवडता पिक्चरदेखील आहे. कुटुंबाने केलेला गुन्हा लपवण्यासाठी तो काय-काय क्लुप्त्या करतो, याचा थरारक प्रवास या चित्रपटात दाखवण्यात आला आहे. पण हा चित्रपट फक्त मनोरंजनासाठी बनवण्यात आला होता. मात्र दिल्लीतील एका इसमाने या चित्रपटा प्रमाणेच सेम कृत्य केल्याचे समोर आले आहे. त्या व्यक्तीने त्याच्या सीनिअरची हत्या (murder news) करून मृतदेह लपवण्यासाठी दृश्यममधील क्लुप्तीचाच वापर (crime news) केल्याचे पोलिसांसमोर उघड झाले आहे.
दिल्लीतील आरके पुरम येथे ही खळबळजनक घटना घडली आहे. येथे एका क्लार्कने त्याच्या सीनिअरची हत्या केली. एवढेच नव्हे तर या हत्येनंतर त्याचा मृतदेह सरकारी क्वॉर्टरमागेच दफन केला आणि त्याच्यावर पक्की फरशी टाकली. पण हत्येच्या पाच दिवसांनंतर पोलिसांनी मृतदेह ताब्यात घेतला. पोलिसांनी आरोपीला अटक केली असून तपासादरम्यान त्याने दिलेल्या कबुलीमुळे ते सगळेच चक्रावले.
का केली सीनिअरची हत्या ?
अनीस असे आरोपीचे नाव असून तो क्लार्क आहे. तर महेश कुमार असे मृत इसमाचे नाव असल्याचे समजते. पोलिसांच्या चौकशीत अनिसने त्याचा गुन्हा कबूल केला. सीनिअर सर्व्हेअर असलेल्या महेश कुमारची अनिसच्या प्रेयसीवर वाईट नजर होती. एवढेच नव्हे तर महेशने अनीसकडून 9 लाख रुपये घेतले होते, ते पण परत करणे बाकी होते. या दोन्ही गोष्टींमुळे अनिस खूप दु:खी होता आणि त्याने महेशला मारण्याचा प्लान आखला. त्याने दृश्यम चित्रपटाप्रमाणे प्लान बनला आणि ऑफीसमधून सुट्टी घेऊन 28 ऑगस्ट रोजी तो लााजपत नगर मार्केटमध्ये गेला. तेथे त्याने 6 फूट लांबीची पॉलिथीन व फावडे विकत घेतले.
त्याच दिवशी दुपारी अनीसने त्याचा सीनिअर महेशला आरके पुरम सेक्टर २ मध्ये असलेल्या सरकारी क्वार्टरमध्ये बोलावले. दुपारी बाराच्या सुमारास महेश त्याच्या घरी पोहोचला असता, अनीसने त्याच्या डोक्याच पाईप मारून त्याची हत्या केली. महेशचा मृत्यू झाल्यानंतर अनिस हा बाईकवरून सोनीपत येथील त्याच्या घरी गेला. पोलिसांना संशय येऊ नये म्हणूनच त्यान सोनीपत येथील घर गाठलं.
दुसऱ्या दिवशी लावली मृतदेहाची विल्हेवाट
हत्येनंतर दुसऱ्या दिवशी, म्हणजेच 29 ऑगस्ट रोजी अनिस त्याच्या घरी परत आला आणि सरकारी क्वॉर्टरच्या मागे असलेल्या जागेत सुमारे दीड फूटचा खड्डा खणून त्यामध्ये मृतदेह पुरला. एवढेच नव्हे तर कोणालाही संशय येऊ नये म्हणून त्याने पक्की फरशी बसवली. याप्रकरणी पोलिसांनी सलग ४ दिवस तपास सुरू ठेवला होता. अखेर सर्व बाजूंनी तपास केल्यानंतर पोलिसांनी महेशचा मृतदेह २ सप्टेंबर रोजी ताब्यात घेतला. सध्या पोलिसांनी आरोपीला अटक केली असून पुढील कारवाई सुरू आहे.
