नियंत्रण सुटल्याने कार थेट विहिरीत कोसळली, कार चालकाचा बुडून मृत्यू
राहुल पठाडे हा तरुण आपल्या पांढऱ्या रंगाच्या अल्टो केटेन कारने शिरुरकडून मलठणकडे जात होता. मात्र येवले माथा येथून पुन्हा तो मागे वळून शिरुरकडे चालला होता. यावेळी ऊसाच्या ट्रॅक्टरला ओव्हरटेक करत असताना त्याचे गाडीवरील नियंत्रण सुटले.
शिरूर/पुणे, सुनील थिगळे (प्रतिनिधी) : कार चालकाचे कारवरील नियंत्रण सुटल्याने कार थेट विहिरीत जाऊन कोसळल्याची दुर्घटना पुणे जिल्ह्याच्या शिरूर तालुक्यातील अण्णापूर येथे घडली आहे. या दुर्घटनेत चालकाचा पाण्यात बुडून दुर्दैवी मृत्यू झाला आहे. राहुल गोपीनाथ पठाडे असं मृत कार चालकाचे नाव आहे. स्थानिक नागरिक आणि प्रशासनाच्या मदतीने कारसह चालकाचा विहिरीतून मृतदेह बाहेर काढण्यात यश आलं आहे. ऊसाच्या ट्रॅक्टरला ओव्हरटेक करताना चालकाचे कारवरील नियंत्रण सुटल्याने दुर्घटना घडली. मयत चालक हा अहमदनगरमधील रहिवासी आहे.
शिरुरकडून मलठणकडे चालला होता तरुण
राहुल पठाडे हा तरुण आपल्या पांढऱ्या रंगाच्या अल्टो केटेन कारने शिरुरकडून मलठणकडे जात होता. मात्र येवले माथा येथून पुन्हा तो मागे वळून शिरुरकडे चालला होता. यावेळी ऊसाच्या ट्रॅक्टरला ओव्हरटेक करत असताना त्याचे गाडीवरील नियंत्रण सुटले.
कार अनियंत्रित झाल्याने विहिरीत पडली
अनियंत्रित कार रस्त्याच्या सोडून 15 फूट लांब असलेल्या विहिरीत पडली. यात बुडून त्याचा दुर्दैवी मृत्यू झाला आहे. घटनेची माहिती मिळताच सहाय्यक पोलीस निरीक्षक अमोल पन्हाळकर, सहाय्यक पोलीस उपनिरीक्षक गणेश देशमाने यांनी घटनास्थळी धाव घेतली.
शिरुर तालुक्यात अनेक ठिकाणी रस्त्याच्या कडेला कठडे नसलेल्या धोकादायक विहिरी आहेत. यामुळे विहिरीत पडून मृत्यू होण्याच्या घटना मोठ्या प्रमाणात घडतात. याबाबत विहीर मालकासह सार्वजनिक बांधकाम विभागाने योग्य उपाययोजना करण्याची गरज आहे.
