बुलढाण्यात संगणक टंकलेखन परीक्षेत मोठा घोटाळा उघड, राज्य शिक्षण..

राज्यात 10 जून ते 14 जून या कालावधीत महाराष्ट्र राज्य परीक्षा परिषद पुणे यांच्याकडून इंग्रजी विषयाची संगणक टंकलेखन परीक्षा घेण्यात आली. बुलढाणा जिल्ह्यातही या परीक्षेचे सात केंद्र आहेत. काल परीक्षा सुरू असताना चिखली येथील अनुराधा इंजीनियरिंग कॉलेजच्या परीक्षा केंद्रावर प्रत्यक्षात 22 विद्यार्थी परीक्षेला बसलेले असताना परीक्षा केंद्रावर 14 विद्यार्थी परीक्षा देत होते. मात्र, पुणे येथील महाराष्ट्र राज्य परीक्षा परिषदेच्या मुख्यालयात प्रत्यक्ष 22 विद्यार्थ्यांनी एक्सेस घेतल्याचे दिसून आले. त्यावेळी शिक्षण परिषदेच्या अध्यक्षांनी परीक्षा केंद्रावरील केंद्रप्रमुखांना व्हिडिओ कॉलद्वारे परीक्षा केंद्रातील विद्यार्थी दाखवण्यास सांगितले.

त्यावेळी परीक्षा केंद्रावर फक्त 14च विद्यार्थी परीक्षा देत होते. इतर आठ विद्यार्थी कुठे आहेत असे विचारले असता केंद्रप्रमुख उत्तर देऊ शकले नाहीत. प्रत्यक्षात 22 ही विद्यार्थी परीक्षेला बसल्याचे एक्सेसवरून स्पष्ट दिसत होते. इतर आठ विद्यार्थी हे घरून किंवा इतर कुठून तरी परीक्षा देत होते.

या परीक्षेचा युजर आयडी व पासवर्ड हा फक्त केंद्र प्रमुख यांच्याकडेच असतो. हे विद्यार्थी बाहेरून परीक्षेला जॉईन कसे झाले?  बुलढाणा जिल्हा शिक्षण अधिकाऱ्यांनी तात्काळ हे केंद्र गाठून हा सगळा गैरप्रकार उघडकीस आणला. बुलढाणा जिल्ह्यातील सातही परीक्षा केंद्रावर अशाच प्रकारे हा घोटाळा सुरू असल्याचे निदर्शनास आल्यानंतर बुलढाणा जिल्हाधिकारी यांना देखील याबाबतची माहिती देण्यात आली.

जिल्हा शिक्षणाधिकारी यांनी पोलिसात तक्रार दिली असून गुन्हा बुलढाणा शहर पोलीस स्टेशनमध्ये नोंदवण्यात आलाय. आयटी शिक्षक गजानन लाघे सह इतर लोकांवर गुन्हा दाखल करण्यात आलाय. कलम 409, 120 ब, 420, आयटी ॲक्ट नुसार गुन्हा दाखल करण्यात आला. हेच नाही तर या परीक्षा घोटाळ्यात आणखी आरोपींची संख्या वाढणार असल्याचे देखील सांगितले जातंय.