‘धुरंधर 2’बद्दल आमिर खानकडून आता सारवासारव; स्वत:चंच करून घेतलं हसू

आदित्य धर दिग्दर्शित ‘धुरंधर: द रिव्हेंज’ हा चित्रपट सध्या जगभरात डंका वाजवतोय. कमाईचा 1000 कोटींचा टप्पा पार केलेला हा चित्रपट अभिनेता आमिर खानने मात्र अद्याप पाहिलेला नाही. ‘धुरंधर 2’ पाहिला नसल्याचं म्हणताच आमिरला सोशल मीडियावर तुफान ट्रोल करण्यात आलं. आता या ट्रोलिंगवर त्याने प्रतिक्रिया दिली आहे. ही प्रतिक्रिया देऊन त्याने पुन्हा एकदा स्वत:चं हसू करून घेतलं आहे. कारण आता त्याने “मी फार क्वचित चित्रपट बघतो”, असं उत्तर देऊन सारवासारव करण्याचा प्रयत्न केला आहे. ‘व्हरायटी इंडिया’ला दिलेल्या मुलाखतीत आमिर म्हणाला, “माझ्याबद्दलची विचित्र गोष्ट म्हणजे मी चित्रपट पाहत नाही. मी वाचक आहे. मी वाचन करतो. लोकांना जेव्हा मोकळा वेळ मिळतो, तेव्हा ते कंटेंट बघतात. एखादा शो किंवा चित्रपट बघतात, मला माझ्या मोकळ्या वेळेत वाचायला आवडतं.”

काय म्हणाला आमिर?

आमिरने पुढे असंही स्पष्ट केलं आहे की त्याला लहानपणापासूनच वाचनाची आवड आहे आणि त्याला चित्रपट बघण्याची परवानगी नव्हती. “मी लहानपणापासून असाच आहे. मला कमी वयातच वाचनाची गोडी लागली. जे चित्रपट मी सातत्याने पाहिले आहेत, ते एकतर ब्लॅक अँड व्हाइट आहे किंवा खूपच जुने आहेत, जे दूरदर्शनवर प्रसारित व्हायचे. मी जुन्या विचारांच्या कुटुंबात वाढलोय आणि माझे पालक चित्रपट बघणं आणि त्यासारख्या गोष्टींबद्दल खूप कठोर होते. आम्हाला चित्रपट बघण्याची परवानगी नव्हती. त्यामुळे मला आठवतंय की, जेव्हा मी माझ्या आईला चित्रपट बघू का असं विचारायचो, तेव्हा ती होकार द्यायची, पण रोमँटिक चित्रपट बघण्याची परवानगी नसायची”, असं त्याने सांगितलं.

लहानपणी दिलीप कुमार, अशोक कुमार आणि मराठीत रमेश देव यांचे चित्रपट पाहिल्याचं त्याने पुढे सांगितलं. आमिरने वयाच्या 18 व्या वर्षी फिल्ममेकिंगमध्ये पाऊल ठेवलं आणि असिस्टंट म्हणून तो काम करू लागला होता. चित्रपटसृष्टीत काम करू लागल्यापासून तो आणखी त्यापासून दुरावला गेला. याविषयी आमिर म्हणाला, “काही जण फुटबॉल खेळतात आणि काहीजण फुटबॉलची मॅच बघतात. हेच समर्पक उत्तर आहे. मी चित्रपट बनवतो, पण फार क्वचित मी चित्रपट बघतो. हेच खरं उत्तर आहे. आताचे चित्रपट मी पाहतच नाही. हॉलिवूडमध्ये काय चाललंय हेसुद्धा मला माहीत नसतं. मी माझ्याच विश्वास रमतो. पण मला चित्रपट बघायला आवडत नाही, असं नाही. मला आवडतं.”