बसल्या बसल्या उगाच उंगल्या.. ढोल-ताशा पथकावरून वाद चिघळला; श्रुती मराठेनंतर आता अभिनेत्याने विद्याधर जोशींना झापलं

Vidyadhar Joshi On Kalaawant Dhol Tasha Pathak : मराठी कलाकारांनी एकत्र येऊन २०१४ मध्ये कलावंत ढोल ताशा पथकाची स्थापना केली होती. श्रुती मराठे, सिद्धार्थ जाधव, तेजस्विनी पंडित, सौरभ गोखले यांसारखे कलाकार या ढोल ताशा पथकात सहभागी झाले असून त्यांच्या ढोल-ताशा वादनाचे व्हिडिओ सोशल मीडियावर व्हायरल होतात. यंदाच्या गणेशोत्सवातही कलाकारांच्या वादनाचे व्हिडिओ मोठ्या प्रमाणात व्हायरल झाले होते. आता या ढोल वादकांवरुन मोठा वाद निर्माण झाला आहे. ज्येष्ठ अभिनेते विद्याधर जोशी यांनी शेअर केलेल्या एका पोस्टमुळे सगळंच वातावरण तापलं. या पोस्टपेक्षा जास्त चर्चा झाली ती त्या पोस्टवर अभिनेत्री श्रुती मराठेनी केलेल्या कमेंटमुळे. आता या प्रकरणावर अभिनेता अभिनेता अभिजीत केळकरने आपले मत मांडले असून त्यांनी विद्यानंद जोशी यांना चांगलंच सुनावलं आहे.

श्रुती आणि विद्याधर जोशी या दोघांच्या पोस्ट कमेंट पाहून अभिजीत केळकर याने सुद्धा आपले मत मांडले आहे.  तो म्हणाला की,”बाप्पा यातल्या एकाही कलाकाराला तू ओळखत नाहीस का? तुझ्याकडे त्यांचे फोन नंबर्स नाही येत का? आणि पुण्यातले, मुंबईतले कलाकार म्हणजे काय असतं!? तुला एवढ्या जेन्युअली हे प्रश्न पडले असते तर त्यांच्यापैकी कोणालाही फोन करून तू हे विचारू शकला असतास किंवा प्रत्यक्ष जाऊनही पाहू शकला असतास….. तू बसल्या बसल्या उगाच उंगल्या करतोस. त्यातून तुला काय साध्य करायचं आहे हे तुलाच माहिती पण एकंदरीतच हल्ली नेहमी उगाच निगेटिव्ह बोलतोस. आता यावर माझ्याशी बोलायला अजिबात फोन करू नकोस मला तुझा राग आलाय.”

विद्याधर जोशी यांनी पोस्टमध्ये लिहीले होते की, ‘एक आपली उत्सुकता…1.हे पुण्यातल्या कलाकार पथकातले कलाकार विसर्जनाच्या मिरवणुकीत एकूण किती वेळ ‘ वादन ‘ करतात?? 2. ज्या जोशाने ते रिल्स मधे वाजवताना दिसतात तितक्याच जोशात ते सतत ‘ वादन ‘ करतात का?’

विद्याधर यांच्या कमेंटवर श्रुती मराठेने रिप्लाय करत लिहिले की, ‘बाप्पा…दीड महिना सराव, ११ दिवसांत १४ वेळा वादन आणि शेवटच्या दिवशी जवळपास साडेसात तासांची विसर्जन मिरवणूक एवढं आम्ही करतो. कारण, आम्हाला वादन करायला मनापासून आवडतं. बाकी आमच्या वादनाची शंका असेल, तर पुढच्या वर्षी जरुर या एक दिवस तरी बघायला. तुमचे सगळे प्रश्न सुटतील. घरी बसून फेसबूकवर टाकून प्रश्नांची उत्तरं मिळत नाहीत बाप्पा. जे लोक आम्हाला लाइव्ह बघतात ते असे प्रश्न फेसबूकवर टाकत नाहीत.’

विद्याधर जोशींची प्रतिक्रिया श्रुतीच्या या कमेंटवर विद्याधर जोशींनी पुन्हा प्रतिक्रिया दिली, ते म्हणाले की ‘श्रुती तुझ्या पहिल्या तीन ओळीत मला माझ्या प्रश्नाचं उत्तर मिळालं धन्यवाद. माझा तुझ्यावरती पूर्ण विश्वास आहे. प्रत्यक्ष येऊन बघायची काहीही गरज नाही आणि तसेही मला येऊन बघण्यापेक्षा कदाचित वाजवणं आवडेल. कारण वाजवणाऱ्याला त्रास होत नाही. बघणाऱ्याला किंवा ऐकणाऱ्याला तो जास्त होतो, असा माझा वैयक्तिक अनुभव आहे. तुला किंवा इतरांना फक्त रील मध्ये बघितल्यामुळे प्रश्न पडले. प्रत्यक्ष बघितलं नाही हे खरंच आहे. पण एफबीवरती प्रश्न विचारून तू माझ्या प्रश्नाला उत्तर दिलंस, याबद्दल तुझे शतशः आभार. तुला माझा राग आला असेल तर ते योग्यच आहे.’ असं विद्याधर जोशी यांनी म्हटलं आहे.