Allu Arjun: अल्लू अर्जुनची मोठी झेप; ‘फोर्ब्स इंडिया’च्या कव्हरवर झळकला ‘पुष्पा’ स्टार
Allu Arjun: 'पुष्पा: द राइज' आणि 'पुष्पा: द रुल' या चित्रपटांमुळे फक्त दक्षिणेतच नाही तर संपूर्ण भारतात लोकप्रियचा मिळवणाऱ्या अल्लू अर्जुनने आणखी एक मोठी झेप घेतली आहे. 'फोर्ब्स इंडिया'च्या कव्हरवर झळकण्याचा मान त्याला मिळाला आहे.
Allu Arjun: साऊथ सुपरस्टार आणि ‘पुष्पा’ फेम अभिनेता अल्लू अर्जुन याच्या शिरपेचात आणखी एक मानाचा तुरा खोवला गेला आहे. अल्लू अर्जुनला आता ‘फोर्ब्स इंडिया’च्या ‘शोस्टॉपर्स 2026’ या विशेष आवृत्तीच्या कव्हरवर स्थान मिळालं आहे. भारतातील 100 प्रभावशाली सेलिब्रिटींचा गौरव करणाऱ्या या यादीत त्याचं नाव समाविष्ट असून, कव्हर स्टार म्हणून त्याची निवड होणं ही त्याच्या वाढत्या पॅन-इंडिया स्टारडमची मोठी पावती मानली जात आहे. अल्लू अर्जुनचा प्रवास केवळ तेलुगू चित्रपटांपुरता मर्यादित राहिलेला नाही. ‘पुष्पा: द राइज’ आणि ‘पुष्पा 2: द रूल’ या चित्रपटांच्या जबरदस्त यशानंतर त्याची लोकप्रियता देशभरात पोहोचली. त्याची स्टाइल, डान्स, संवादफेक आणि पडद्यावरील वेगळ्या अंदाजाने हिंदी पट्ट्यातही मोठा चाहतावर्ग निर्माण केला.
‘पुष्पा’ फ्रँचाइझीने अल्लू अर्जुनला पॅन-इंडिया स्टार म्हणून नवी ओळख मिळवून दिली. त्याचा परिणाम केवळ बॉक्स ऑफिसवरच नाही, तर ब्रँड व्हॅल्यू आणि जाहिरातींच्या बाजारपेठेतही दिसून आला. ‘फोर्ब्स इंडिया’च्या या सन्मानातून त्याच्या वाढत्या प्रभावाची पुन्हा एकदा दखल घेण्यात आली आहे. ‘फोर्ब्स इंडिया’च्या ‘शोस्टॉपर्स 2026’ आवृत्तीत मनोरंजन, क्रीडा, संगीत आणि लोकप्रिय संस्कृतीतील देशातील आघाडीच्या सेलिब्रिटींचा गौरव करण्यात आला आहे. या यादीत अल्लू अर्जुनसोबत शाहरुख खान, विराट कोहली आणि स्मृती मंधाना यांसारख्या मोठ्या नावांचाही समावेश आहे.
View this post on Instagram
विशेष म्हणजे, तेलुगू चित्रपटसृष्टीतून अल्लू अर्जुन आणि राम चरण या दोघांनाच या यादीत स्थान मिळालं आहे. त्यामुळे या दोन्ही कलाकारांच्या माध्यमातून तेलुगू सिनेमाचा वाढता राष्ट्रीय प्रभावही अधोरेखित झाला आहे. अल्लू अर्जुनची लोकप्रियता आता केवळ त्याच्या चित्रपटांच्या कमाईवर मोजली जात नाही. त्याचा फॅशन सेन्स, सोशल मीडिया प्रभाव आणि ब्रँड्ससोबतचं नातं यामुळे तो देशातील प्रभावशाली सेलिब्रिटींपैकी एक बनला आहे.
अल्लू अर्जुनकडे सध्या मोठे प्रोजेक्ट्स आहेत. तो अटली दिग्दर्शित ‘राका’ या आगामी चित्रपटावर काम करत आहे. याशिवाय लोकेश कनगराजसोबतच्या AA23 या प्रोजेक्टचीही चर्चा आहे. त्यामुळे येत्या काळात त्याचा पॅन-इंडिया प्रभाव आणखी वाढण्याची शक्यता आहे.
