इतकी कसली घाई? जितेंद्र यांना धक्का मारल्याने अनिल कपूरच्या मुलीवर भडकले नेटकरी

मुंबई | 6 ऑक्टोबर 2023 : ज्येष्ठ अभिनेते जितेंद्र आणि अनिल कपूर हे त्यांच्या मुलींचा चित्रपट प्रमोट करण्यासाठी एकत्र आले आहेत. अनिल कपूर यांची मुलगी रिया कपूर आणि जितेंद्र यांची मुलगी एकता कपूर यांनी मिळून ‘थँक्यू फॉर कमिंग’ हा चित्रपट प्रेक्षकांच्या भेटीला आणला आहे. आजच (6 ऑक्टोबर) हा चित्रपट थिएटरमध्ये प्रदर्शित झाला. त्यापूर्वी मुंबईत नुकत्याच एका कार्यक्रमाचं आयोजन करण्यात आलं होतं. यावेळी मंचावर अभिनेते जितेंद्र, जॅकी श्रॉफ, रिया कपूर, अनिल कपूर असे बरेच सेलिब्रिटी उपस्थित होते, मात्र मंचावर घडलेल्या एका घटनेनंतर अनिल कपूर यांच्या मुलीला सोशल मीडियावर जोरदार ट्रोल केलं जातंय. रिया कपूर ही अनिल कपूर यांची छोटी मुलगी आहे.

अनिल कपूर यांच्या मुलीकडून मंचावर चूक

रियाने ‘थँक्यू फॉर कमिंग’ या चित्रपटाची निर्मिती एकता कपूरसोबत मिळून केली. नुकतंच या दोघींनी चित्रपटाच्या स्क्रीनिंग पार्टीचं आयोजन केलं होतं. यावेळी मंचावर रियाकडून अनवधानाने एक चूक झाली. त्याचाच व्हिडिओ सध्या सोशल मीडियावर व्हायरल होत आहे. या व्हिडिओवर कमेंट करत नेटकरी तिला खरंखोटं सुनावत आहेत.

रिया कपूर नेटकऱ्यांकडून ट्रोल

या व्हिडीओत दिसतंय की अभिनेते जॅकी श्रॉफ यांना भेटण्यासाठी रिया कपूर पुढे जाते. मात्र तिच्या बाजूला उभे असलेले अभिनेते जितेंद्र यांच्याकडे ती दुर्लक्ष करते. यावेळी जितेंद्र यांना रियाचा धक्का लागतो आणि स्टेजवर ते अडखळतात. जितेंद्र यांच्या बाजूला उभे असलेले कलाकार त्यांना सावरतात. त्याचवेळी रियाचं लक्ष त्यांच्याकडे जातं आणि त्यांचा हात पकडून ती माफी मागते. मात्र त्यानंतर जेव्हा ती जॅकी श्रॉफ यांच्यासोबत बोलू लागते, तेव्हा जितेंद्र तिचा हात पकडूनच उभे असतात. हा व्हिडिओ पाहिल्यानंतर जितेंद्र यांचे चाहते रियावर चांगलेच भडकले आहेत. इतकी कसली घाई होती की तुझ्या बाजूलाच उभे असलेले ज्येष्ठ अभिनेते तुला दिसले नाहीत, असं एकाने लिहिलं. तर माफीसुद्धा नीट मागता आली नाही. इतका कसला अहंकार, अशी कमेंट दुसऱ्या युजरने केली.