या मुस्लिमाला शिवी देऊ की नको..; ‘धुरंधर 2’ वर भडकले असदुद्दीन ओवैसी, रणवीरबद्दल म्हणाले..

Asaduddin Owaisi On Dhurandhar 2: आदित्य धर दिग्दर्शित ‘धुरंधर: द रिव्हेंज’ हा चित्रपट सध्या बॉक्स ऑफिसवर कमाईचे नवनवे विक्रम रचतोय. थिएटर्सपासून सोशल मीडियापर्यंत सर्वत्र फक्त याच चित्रपटाची जोरदार चर्चा आहे. परंतु रणवीर सिंहची मुख्य भूमिका असलेल्या या चित्रपटाचं जितकं कौतुक होतंय, तितकीच त्यावर टीकासुद्धा होत आहे. हा चित्रपट प्रचारकी असल्याचं काहीजण म्हणत आहेत. त्यातच आता खासदार आणि ऑल इंडिया मजलिस-ए-इत्तेहादुल मुस्लिमीनचे (AIMIM) अध्यक्ष असदुद्दीन ओवैसी यांनी चित्रपटावर रोखठोक प्रतिक्रिया दिली आहे. ओवैसी यांनी या चित्रपटाला थेट ‘बकवास’ असं म्हटलं आहे.

‘टाइम्स नाऊ’ला दिलेल्या मुलाखतीत असदुद्दीन ओवैसी यांना ‘धुरंधर’ या चित्रपटाबद्दल प्रश्न विचारला असता ते म्हणाले, “तो काही चित्रपट आहे का? एखाद्याला तीन तास पाहण्याइतका माझ्याकडे वेळ नाही. मला असं वाटतं की लोकांनी मला एक तास ऐकावं. तीन तास बकवास. त्यात असतं तरी काय, शिवीगाळ व्यतिरिक्त. हिंसेला प्रमोट करा आणि तीन तासांनंतर तुम्ही हे विचार करून बाहेर पडता की यार या मुस्लिमाला शिवी देऊ की नको. आता त्याला पाहून काय करणार, कोण बघणार?” पुढे ओवैसी यांना सांगितलं गेलं की संपूर्ण जगभरात हा चित्रपट पाहिला जातोय. त्यावर ते म्हणाले, “आम्ही हैदराबादीमध्ये म्हणतो की, प्यारे इन चीजों को दिल पर मत लो, गुर्दे पर लो. तो हम गुर्दे पर लेकर छोड देते हैं इसको. अडचण ही आहे की हे बकवास आहे.”

‘धुरंधर 2’ या चित्रपटात रणवीरसोबतच अर्जुन रामपाल, संजय दत्त, राकेश बेदी, सारा अर्जुन आणि आर. माधवन यांच्या भूमिका आहेत. डिसेंबर 2025 मध्ये या चित्रपटाचा पहिला भाग प्रेक्षकांच्या भेटीला आला होता. या पहिल्या भागाने जगभरात तब्बल 1300 कोटी रुपयांचा गल्ला जमवला होता. त्यानंतर 19 मार्च 2026 रोजी ‘धुरंधर 2’ हा दुसरा भाग प्रदर्शित झाला. गेल्या 9 दिवसांत या चित्रपटाने जगभरात 1100 कोटी रुपये कमावले आहेत.

या चित्रपटात भारतीय गुप्तहेराची कथा दाखवण्यात आली आहे. सत्य घटनांपासून प्रेरित ही कथा असल्याचा दावा केला जात आहे. रणवीरने त्यात हमजा अली मजारी आणि जसकीरत सिंह रंगी अशा दुहेरी छटा असलेल्या भूमिका साकारल्या आहेत. त्याच्या जबरदस्त अभिनयकौशल्याचं प्रेक्षक-समीक्षकांकडून कौतुक होत आहे.