Bigg Boss 20: ‘बिग बॉस 20’मध्ये मोठा ट्विस्ट; घटस्फोटामुळे चर्चेत आलेली स्पर्धक तिसऱ्याच आठवड्यात घराबाहेर
Bigg Boss 20: तिसऱ्याच आठवड्यात बिग बॉसच्या घरातून एक स्पर्धक बाहेर पडली आहे. घटस्फोटामुळे आणि वैयक्तिक आयुष्यामुळे ही स्पर्धक चर्चेत होती. आता तिच्या एलिमिनेशननंतर घरात 14 स्पर्धक राहिले आहेत.
Bigg Boss 20: ‘बिग बॉस 20’च्या घरात सध्या एकापाठोपाठ एक धक्कादायक घडामोडी घडताना दिसत आहेत. ‘वीकेंड का वार’मध्ये पंजाबी अभिनेत्री ईशा रिखीचा शोमधील प्रवास संपला आहे. रॅपर बादशाहची पूर्व पत्नी म्हणून शोमध्ये प्रवेश करण्यापूर्वीच ईशाची जोरदार चर्चा झाली होती. मात्र, प्रेक्षकांकडून अपेक्षित मतांचा पाठिंबा न मिळाल्याने तिला तिसऱ्याच आठवड्यात ‘बिग बॉस’चा निरोप घ्यावा लागला. या आठवड्यात ईशा रिखी आणि रॅपर यंग डीएसए हे एलिमिनेशनसाठी नॉमिनेट झाले होते. दोघांपैकी कोणाचा प्रवास थांबणार, याकडे प्रेक्षकांचं लक्ष लागलं होतं. अखेर वोटिंगच्या निकालानंतर ईशाला घराबाहेर जावं लागलं. यंग डीएसएला ईशाच्या तुलनेत अधिक मतं मिळाल्याचं समोर आलं आहे. त्यामुळे ईशाचा ‘बिग बॉस’मधील प्रवास अवघ्या तीन आठवड्यांत संपला.
सलमान खानने केली एलिमिनेशनची घोषणा
रविवारच्या ‘वीकेंड का वार’ एपिसोडमध्ये सलमान खानने ईशाच्या एलिमिनेशनची घोषणा केली. या सिझनमधून बाहेर पडणारी ती दुसरी स्पर्धक ठरली आहे. ईशाने घरात स्वतःची जागा निर्माण करण्याचा प्रयत्न केला, मात्र प्रेक्षकांच्या मतदानात तिला अपेक्षित प्रतिसाद मिळाला नाही. ईशाच्या तीन आठवड्यांच्या प्रवासाला प्रेक्षकांकडून संमिश्र प्रतिक्रिया मिळाला. काहींना तिचा गेम आवडला, तर काही प्रेक्षकांच्या मते ती स्पर्धेत आपली ठोस ओळख निर्माण करू शकली नाही.
View this post on Instagram
बादशाहसोबतच्या नात्यामुळे होती चर्चेत
ईशा रिखी ‘बिग बॉस 20’मध्ये सहभागी होण्याआधीच तिच्या वैयक्तिक आयुष्यामुळे चर्चेत होती. रॅपर बादशाहसोबतच्या तिच्या नात्यामुळे तिचं नाव सातत्याने चर्चेत आलं होतं. त्यामुळे शोमध्ये प्रवेश केल्यानंतर तिच्या वैयक्तिक आयुष्याबाबतही प्रेक्षकांमध्ये उत्सुकता होती. मात्र, घरातील तिचा प्रवास फार काळ टिकला नाही. ईशा रिखीच्या एलिमिनेशननंतर ‘बिग बॉस 20’च्या घरात आता 14 स्पर्धक उरले आहेत. याआधी रोहिद खान शोमधून बाहेर पडला होता. त्यामुळे स्पर्धा जसजशी पुढे सरकत आहे, तसतसं घरातील सदस्यांवर दबाव वाढताना दिसत आहे.
आगामी काळात शोमध्ये वाइल्डकार्ड एण्ट्री होण्याची शक्यताही व्यक्त केली जात आहे. नव्या स्पर्धकांच्या आगमनामुळे घरातील सध्याची समीकरणं, ग्रुप्स आणि नाती बदलण्याची शक्यता आहे. त्यामुळे ईशाच्या एलिमिनेशननंतर ‘बिग बॉस 20’मध्ये पुढे कोणते नवे ट्विस्ट पाहायला मिळणार, याकडे प्रेक्षकांचं लक्ष लागलं आहे.
