Prakash Jha: “इथे मुलीने जीन्स घातली तरी..”; प्रकाश झा यांचं सडेतोड उत्तर

दिग्दर्शक प्रकाश झा (Prakash Jha) हे नुकत्याच दिलेल्या मुलाखतीत बॉलिवूडच्या ‘कॅन्सल कल्चर’वर (Cancel Culture) व्यक्त झाले. आश्रम (Aashram) या वेब सीरिजमधून हिंदुंच्या भावना दुखावल्याच्या आरोपांवरही त्यांनी प्रतिक्रिया दिली. प्रकाश झा यांची आश्रम ही सीरिज एमएक्स प्लेअरवर प्रदर्शित झाली होती. या सीरिजवर हिंदुंच्या भावना दुखावल्याचा आरोप झाला. इतकंच नव्हे तर भोपाळमध्ये या सीरिजच्या सेटचीही तोडफोड करण्यात आली होती. ट्विटरवर या सीरिजविरोधात बॉयकॉटचा ट्रेंड सुरू झाला होता. यावर बोलताना प्रत्येकाला व्यक्त होण्याचं स्वातंत्र्य आहे, असं प्रकाश झा म्हणाले.

ई टाइम्सला दिलेल्या मुलाखतीत ते म्हणाले, “गेल्या अनेक वर्षांपासून लोक माझ्यावर नाराज आहेत. आता मला हेच बोलावं लागेल की संविधानात व्यक्त होण्याच्या स्वातंत्र्यासोबतच नाराज होण्याचंही स्वातंत्र्य असावं. भारतात हे मूलभूत हक्कांच्या यादीत समाविष्य केलं जावं. कारण आपण प्रत्येक गोष्टीने नाराज होतोच. जर एखादी मुलगी जीन्स परिधान करत असेल, तरी आपल्याला आक्षेप असतो. एखाद्याने टिळा लावला किंवा श्लोक म्हटलं तरी त्यावर आक्षेप नोंदवला जातो. नाराज होण्याचा तुम्हाला पूर्ण अधिकार आहे, त्यामुळे घाबरू नका.”

प्रकाश झा यांचा ‘मट्टो की सायकील’ हा चित्रपट लवकरच प्रेक्षकांच्या भेटीला येणार आहे. या चित्रपटाच्या प्रमोशननिमित्त ते मुलाखती देत आहेत. या मुलाखतींमध्ये त्यांनी बॉयकॉट ट्रेंडवरही आपलं मत मांडलं. “ते बकवास चित्रपट बनवतायत हे त्यांना समजलं पाहिजे. फक्त पैसा, कॉर्पोरेट्स आणि कलाकारांना तगडं मानधन देऊन चित्रपट बनत नाहीत. त्यासाठी तुम्हाला चांगली कथा लिहावी लागेल”, असं ते म्हणाले.