स्मृती मंधानाशी लग्न मोडलं; सलमानची हिरोइन पलाश मुच्छलला म्हणाली ‘चांगला माणूस’

क्रिकेटर स्मृती मंधानाशी लग्न मोडल्यापासून संगीतकार आणि दिग्दर्शक पलाश मुच्छल वादाच्या भोवऱ्यात सापडला आहे. पलाशवर फसवणुकीचे आरोप करण्यात आले आणि त्यानंतर सोशल मीडियावरही त्याला बरंच ट्रोल करण्यात आलं. अशातच सलमान खानसोबत काम केलेली अभिनेत्री आणि प्रसिद्ध डान्सर-कोरिओग्राफर डेजी शाहने पलाशचं कौतुक केलं आहे. ‘फिल्मीज्ञान’ या वेबसाइटला दिलेल्या मुलाखतीत डेजीने पलाशसोबतच्या पहिल्या भेटीचा किस्सा सांगितला. पलाशची बहीण आणि गायिका पलक मुच्छलमुळे डेजीची पलाशशी भेट झाली होती. पलकने डेजीच्या पदार्पणातील ‘जय हो’ या चित्रपटातील गाणं गायलं होतं. तिथूनच त्यांची मैत्री सुरू झाली होती.

या भेटीविषयी डेजी म्हणाली, “पलाश हा व्यक्ती म्हणून खूप चांगला आहे. मी त्याला दोन-चार वेळा भेटले आहे. पलकने माझ्या ‘जय हो’ या चित्रपटासाठी गाणं गायलं होतं, त्यामुळे तेव्हापासून मी तिला ओळखते. पलकच्या घरी पार्ट्यांना आणि गणपती पूजाला माझं जाणं-येणं असतंच. तिथेच माझी भेट पलाश मुच्छलशी झाली. तो संगीतकार आणि दिग्दर्शक आहे हे तेव्हाच मला समजलं होतं.”

“मी पलाशच्या कुटुंबीयांना भेटले आहे आणि ते खूप सुंदर कुटुंब आहे. त्यांच्या कुटुंबातील सर्वजण अत्यंत नम्र स्वभावाचे आहेत. त्यांचा देवावर खूप विश्वास आहे आणि माझ्या मते त्यांबद्दलची ही खूप चांगली गोष्ट आहे. देवावर विश्वास ठेवणारे लोक अत्यंत सकारात्मक असतात”, अशा शब्दांत डेजी व्यक्त झाली. आश्चर्याची बाब म्हणजे स्मृती मंधानाशी लग्न मोडल्यानंतर पलाशवर अनेक आरोप झाले. लग्नाच्या एक दिवस आधी त्याला कोरिओग्राफरसोबत रंगेहाथ पकडल्याचीही जोरदार चर्चा होती. 23 नोव्हेंबर 2025 रोजी पलाश आणि स्मृती लग्नबंधनात अडकणार होते. सांगलीत मेहंदी आणि हळदीचा कार्यक्रम धूमधडाक्यात पार पडला होता. परंतु लग्नाच्या दिवशीच स्मृतीच्या वडिलांची तब्येत बिघडली आणि त्यांना रुग्णालयात दाखल करण्यात आलं होतं. त्यानंतर हळूहळू पलाशबद्दलच्या चर्चा समोर येऊ लागल्या होत्या. काही दिवसांनी पलाश आणि स्मृती यांनी सोशल मीडियावर पोस्ट लिहित लग्न होणार नसल्याची माहिती चाहत्यांनी दिली होती.

लग्न मोडल्यानंतर पलाश आणि स्मृती त्यांच्या वैयक्तिक आयुष्यात पुढे निघून गेले आहेत. स्मृतीने क्रिकेटवर अधिक लक्ष केंद्रीत केलं, तर दुसरीकडे पलाशने अभिनेता श्रेयस तळपदेसोबत प्रोजेक्टची घोषणा केली. पलाशच्या आगामी चित्रपटात श्रेयस भूमिका साकारणार आहे.