Dhurandhar 2: 12:12 ची मोठी मिस्ट्री, धुरंधरच्या दिग्दर्शकाची घोषणा; अखेर संपणार प्रतीक्षा

आदित्य धर दिग्दर्शित ‘धुरंधर’ या चित्रपटाच्या सीक्वेलविषयी प्रेक्षकांमध्ये प्रचंड उत्सुकता निर्माण झाली आहे. या सीक्वेलविषयी आता आदित्यने मोठी हिंट दिली आहे. आज 3 फेब्रुवारी 2026 रोजी दुपारी 12:12 वाजता हा टीझर प्रेक्षकांच्या भेटीला येणार असल्याचं समजतंय. या टीझरविषयी प्रेक्षकांमध्ये प्रचंड उत्सुकता आहे. सोशल मीडियावर प्रत्येकजण याची चर्चा करत आहे. ‘धुरंधर’ने बॉक्स ऑफिसवर मोठा धमाका आधीच केला आहे आणि आता ओटीटी प्लॅटफॉर्मवरही त्याची जबरदस्त क्रेझ पहायला मिळतेय. त्यामुळे सीक्वेलची कथा, भूमिका आणि नव्या ट्विस्टबद्दल प्रचंड उत्सुकता आहे. आदित्य धर आणि रणवीर सिंह यांनी त्यांच्या इन्स्टा स्टोरीमध्ये ‘उद्या 12:12’ अशी पोस्ट लिहिली आहे. त्यामुळे दुपारी सीक्वेलचा टीझर प्रदर्शित होणार असल्याचा अंदाज व्यक्त केला जात आहे.

‘धुरंधर’मध्ये गुप्तहेर हमजा अली मजारी या नावाने पाकिस्तानात जातो. ल्यारीमधील बलुच टोळीचा गुंड रेहमान डकैत याचा विश्वास जिंकून तो त्याच्या टोळीत सामील होतो. नंतर एसपी अस्लम चौधरीच्या मदतीने तो रेहमानच्या हत्येचा कट रचतो. तर दुसरीकडे संपूर्ण कराचीवर मला राज्य करायचं आहे, असं तो प्रेयसी यलिनासमोर म्हणतो. चित्रपटाच्या शेवटी हमजा एक गुप्त डायरी उघडतो, ज्यामध्ये ISI अधिकारी मेजर इक्बालसह अनेक हाय-प्रोफाइल नावं असतात. हे मिशन म्हणजे फक्त सुरुवात आहे, असं अजय सन्याल स्पष्ट करतात.

रणवीर सिंहची पोस्ट

‘धुरंधर’च्या पहिल्या भागात हमजाची पाकिस्तानमध्ये घुसखोरी आणि रेहमान डकैतचा खात्मा दाखवण्यात आला. तर आता सीक्वेलमध्ये हमजाची पार्श्वभूमी, त्याचा भूतकाळ, तो या गुप्त मोहिमेत कसा सहभागी झाला याबद्दलची कथा दाखवण्यात येईल. पहिल्या भागात अजय सन्यालच्या भूमिकेतील आर. माधवनचा स्क्रीनटाइम मर्यादित होता, परंतु दुसऱ्या भागात त्याची भूमिका मोठी असेल. रणवीरला तो प्रशिक्षण देताना दिसणार आहे. या सीक्वेलमध्ये बडे साहबच्या चेहऱ्यावरूनही पडदा उचलण्यात येईल. तो मेजर इक्बालच आहे की दुसरा कोणी, हे स्पष्ट होईल.

‘धुरंधर 2’मध्ये या प्रश्नांची उत्तरं मिळतील का?

• ल्यारीवर राज्य करणार हमजा, बडे साहबचा चेहऱ्यावरून उठणार पडदा; 12:12 ला होणार मोठा धमाका
• हमजा त्याची ओळख लपवून ल्यारीचा पूर्ण ताबा कसा घेणार?
• हमजाच रेहमानला मारतो हे उजैर बलोचला कळेल का?
• मेजर इक्बाल आणि एसपी अस्लम चौधरी हे हमजाची खरी ओळख शोधून काढू शकतील का?