खूप रडले, वेदना इतक्या तीव्र की..; सर्जरीनंतर दीपिकाची झाली अशी अवस्था
'ससुराल सिमर का' या मालिकेतून घराघरात पोहोचलेली अभिनेत्री दीपिका कक्कर नुकत्याच एका व्लॉगमध्ये तिच्या प्रकृतीविषयी मोकळेपणे व्यक्त झाली. दीपिकाच्या पोटात सिस्ट आढळले असून तिच्यावर शस्त्रक्रिया करण्यात आली.
प्रसिद्ध टीव्ही अभिनेत्री दीपिका कक्कर एकानंतर एक आरोग्याच्या समस्यांनी त्रस्त आहे. काही महिन्यांपूर्वीच तिच्यावर लिव्हर कॅन्सरीची सर्जरी झाली होती. त्यातून हळूहळू बरी होत असतानाच आता दीपिकाच्या पोटात सिस्ट आढळले. अचानक पोटात तीव्र वेदना जाणवू लागल्याने तिने डॉक्टरांच्या सल्ल्यानुसार काही टेस्ट केल्या. त्यात पोटात 1.3 सेंटिमीटरचं सिस्ट असल्याचं निदान झालं होतं. त्यानंतर डॉक्टरांनी लगेचच तिला दाखल होऊन सर्जरी करावी लागणार असल्याचं सांगितलं होतं. नुकतीच दीपिकावरील शस्त्रक्रिया पूर्ण झाली असून तिची प्रकृती सुधारतेय. आधी दीपिकाचा पती शोएब इब्राहिमने सोशल मीडियावर पोस्ट लिहित तिच्या आरोग्याविषयीची माहिती दिली. त्यानंतर आता दीपिकाने तिच्या युट्यूब चॅनलवर नवीन व्लॉग पोस्ट केला आहे. या व्लॉगमध्ये तिने रुग्णालयातून घरी परतल्याचं सांगितलं आहे,
दीपिकाने या व्लॉगमध्ये सांगितलं की गेल्या काही दिवसांपासून तिला प्रचंड वेदना सहन कराव्या लागल्या होत्या. पोटात सिस्ट झाल्याचं कळताच ती खूप चिंतेत होती. त्याचदरम्यान तिच्या लग्नाचा वाढदिवस होता. पती शोएबसोबत ती हा लग्नाचा वाढदिवस साजरा करू शकली नव्हती. “संपूर्ण प्रक्रिया योग्यरित्या पार पडली. सर्वांना वाटत होतं की पुन्हा कॅन्सर झाला की काय, परंतु तसं काहीच नाही. सर्वकाही अत्यंत जलदगतीने झालं. डॉक्टर म्हणाले की लगेच दाखल हो, त्याचदरम्यान आमच्या लग्नाचा वाढदिवस होता. त्यामुळे सर्वकाही समजण्यात थोडा वेळ लागला. सर्वांची हिंमत सोबत असली की वेळ निघून जाते. मी ऑपरेशन थिएटरमध्ये जाताना खूप घाबरले होते. मी खूप रडले, परंतु डॉक्टरांनी मला समजावून सांगितलं. माझ्या पोटातील सिस्टचा आकार लहान असल्याने ऑपरेशन सहजरित्या झालं. जर आकार मोठा असता तर शस्त्रक्रिया आणखी कठीण असती”, असं दीपिका म्हणाली.
या व्लॉगमध्ये दीपिकाने अल्लाहचे आभार मानले. याविषयी तिने पुढे सांगितलं, “सुदैवाने योग्य वेळी सिस्टचं निदान झाल्याने उपचार पटकन झाले. सर्जरीनंतर मला फार वेदना जाणवत होत्या. पोटातील सिस्ट जाळून नष्ट करण्यात आलं होतं, त्यामुळे या वेदना खूप वेगळ्या होत्या. सध्या हालचाली करतानाही वेदना होत आहेत. सर्जरीनंतर अर्धा तास मला प्रचंड दुखत होतं. माझ्या आरोग्यासाठी ज्या चाहत्यांनी प्रार्थना केल्या, त्यांचे मी आभार मानते.”
