Devendra Fadnavis on Hanuman Ansh: ‘हनुमान अंश’ची टीम थेट ‘वर्षा’वर; मुख्यमंत्री फडणवीस म्हणाले..
गणपती बाप्पांच्या दर्शनासोबत मुख्यमंत्र्यांची भेट आणि मिळालेल्या शुभेच्छांमुळे ‘हनुमान अंश’च्या टीमसाठी हा प्रसंग संस्मरणीय ठरला आहे. बॉक्स ऑफिसवरील यशानंतर मिळालेलं हे कौतुक चित्रपटाच्या प्रवासातील आणखी एक चर्चेचा टप्पा ठरलं आहे.
Devendra Fadnavis on Hanuman Ansh: सध्या बॉक्स ऑफिसवर ‘हनुमान अंश’ या चित्रपटाची जोरदार चर्चा सुरू आहे. प्रदर्शनाच्या सुरुवातीला फारशी हवा नसलेल्या या चित्रपटाने प्रेक्षकांच्या सकारात्मक प्रतिसादामुळे दमदार कामगिरी केली आहे. याच पार्श्वभूमीवर चित्रपटाचे दिग्दर्शक डॉ. विशाल चतुर्वेदी आणि संपूर्ण टीमने महाराष्ट्राचे मुख्यमंत्री देवेंद्र फडणवीस यांची मुंबईतील त्यांच्या अधिकृत निवासस्थानी ‘वर्षा’ इथं भेट घेतली. गणेशोत्सवाच्या निमित्ताने झालेल्या या भेटीत टीमने गणपती बाप्पांचं दर्शन घेतलं. मुख्यमंत्री फडणवीस यांनी या भेटीचे फोटो आणि व्हिडीओ सोशल मीडियावर शेअर करत चित्रपटाच्या टीमचं अभिनंदन केलं.
मुख्यमंत्री देवेंद्र फडणवीस यांनी सोशल मीडियावर पोस्ट करत डॉ. विशाल चतुर्वेदी आणि त्यांच्या टीमच्या कामाचं कौतुक केलं. ‘हनुमान अंश’च्या टीमचं ‘वर्षा’वर स्वागत करताना आनंद झाला, असं त्यांनी नमूद केलं. तसंच गणपती बाप्पांचं आशीर्वाद घेतल्यानंतर विशाल चतुर्वेदी आणि टीमचं त्यांच्या उत्कृष्ट कामासाठी अभिनंदन केलं आणि आगामी प्रकल्पांसाठी शुभेच्छा दिल्या.
फडणवीसांचं ट्विट-
It was great to have team ‘Hanuman Ansh’ at Varsha, last evening, to seek blessings of Ganpati Bappa. Congratulated Vishal Chaturvedi and team on their great work and wished more success in all the endeavours!
वर्षा, मुंबई येथे गणपती बाप्पांच्या दर्शनासाठी आलेल्या ‘हनुमान अंश’… pic.twitter.com/EQJZPQ61Q5
— Devendra Fadnavis (@Dev_Fadnavis) September 19, 2026
बॉक्स ऑफिसवर ‘हनुमान अंश’ची दमदार वाटचाल
‘हनुमान अंश’ हा अध्यात्मिक चित्रपट असून तो नीम करोली बाबा यांच्या जीवनप्रवासावर आधारित आहे. दिग्दर्शक विशाल चतुर्वेदी यांनी या चित्रपटाची कथा आणि दिग्दर्शनाची जबाबदारी सांभाळली आहे. 7 ऑगस्ट 2026 ला चित्रपट प्रदर्शित झाला. सुरुवातीला पहिल्या दिवशी चित्रपटाची कमाई मर्यादित होती; मात्र प्रेक्षकांकडून मिळालेल्या सकारात्मक प्रतिक्रियांमुळे चित्रपटाने हळूहळू वेग पकडला. त्यानंतर बॉक्स ऑफिसवर त्याची कमाई सातत्याने वाढत गेली. मिळालेल्या माहितीनुसार, ‘हनुमान अंश’ने जगभरातील बॉक्स ऑफिसवर 300 कोटी रुपयांचा टप्पा पार केला आहे. त्यामुळे चित्रपटाच्या टीमसाठी मुख्यमंत्र्यांची भेट अशा यशाच्या काळात विशेष ठरली आहे. कमी गाजावाजा करत प्रदर्शित झालेल्या चित्रपटाने प्रेक्षकांच्या तोंडी प्रसिद्धीच्या जोरावर मोठा पल्ला गाठला आहे.
मुख्यमंत्री देवेंद्र फडणवीस यांच्याकडून मिळालेलं कौतुक दिग्दर्शक विशाल चतुर्वेदी आणि त्यांच्या टीमसाठी महत्त्वाचा क्षण ठरला आहे. ‘हनुमान अंश’च्या यशानंतर चतुर्वेदी आता पुढील प्रकल्पांवरही काम करत आहेत. त्यांच्या पुढील चित्रपटांपैकी एक प्रकल्प गोस्वामी तुलसीदास यांच्या जीवनावर आधारित असल्याचं समोर आलं आहे.
