एकट्याने चित्रपट पाहण्यासाठी 10 हजारांचं बक्षीस; थिएटरबाहेर ॲम्ब्युलन्स

हॉरर चित्रपट म्हटलं की अनेकजण सहसा बॉलिवूड चित्रपट बघणं टाळतात. हॉलिवूड चित्रपटांच्या तुलनेत बॉलिवूडमध्ये हॉरर तितक्या दमदार पद्धतीने दाखवलं जात नाही, असं काहींचं मत आहे. परंतु एक काळ असा होता, जेव्हा थिएटरमध्ये बॉलिवूडचे हॉरर चित्रपट पाहण्यासाठी प्रेक्षकांची गर्दी व्हायची. बॉलिवूड इंडस्ट्रीत काही असे हॉरर चित्रपट बनले आहेत, ज्यांनी प्रेक्षकांची अक्षरश: घाबरगुंडी उडवली आहे. राज, 1920, डरना मना है, कृष्णा कॉटेज यांसारख्या चित्रपटांना प्रेक्षकांकडून खूप चांगला प्रतिसाद मिळाला होता. असाच एक चित्रपट ऐशी आणि नव्वदच्या दशकात प्रदर्शित झाला होता. या चित्रपटाला पाहून प्रेक्षकांची बोबडीच वळायची आणि त्यावेळी त्याचे अत्यंत भयानक किस्से ऐकायला मिळायचे. असं म्हटलं जातं की जेव्हा हा चित्रपट थिएटरमध्ये प्रदर्शित झाला, तेव्हा बाहेर अॅम्ब्युलन्स उभी राहायची. जेणेकरून प्रेक्षकांना काही आरोग्याची समस्या जाणवली की लगेच मदत मिळावी.

ज्या चित्रपटाबाबत आम्ही इथे बोलतोय, त्याचं नाव ‘बंद दरवाजा’ आहे. या चित्रपटाचं दिग्दर्शन रामसे ब्रदर्सने केलं होतं आणि 1 जून 1990 रोजी तो थिएटरमध्ये प्रदर्शित झाला होता. ‘बंद दरवाजा’ हा त्यांच्या सर्वांत भयानक चित्रपटांपैकी एक मानलं जात होतं. मोठ्या पडद्यावर ड्रॅकुलासारख्या राक्षसाला पाहून लोकांच्या अंगावर अक्षरश: काटा यायचा. त्यावेळी या चित्रपटाची एवढी चर्चा होती की रामसे ब्रदर्स हा चित्रपट एकटं पाहणाऱ्यांना 10 हजार रुपयांचं बक्षिस द्यायचे.

या चित्रपटाचं बजेट फक्त 40 लाख रुपये होतं. बॉक्स ऑफिसवर त्याला दमदार प्रतिसाद मिळाला आहे त्या काळी ‘बंद दरवाजा’ने 68 लाख रुपयांचा गल्ला जमवला होता. तर जगभरातील कमाईचा आकडा 96 कोटींवर पोहोचला होता. या चित्रपटात कुनिका सदानंद, मंजित कुल्लर, अरुणा इरानी, अनिरुद्ध अग्रवाल, अफगाणी अभिनेत्री हशमत खान आणि रजा मुराद यांच्या भूमिका होत्या. रामसे ब्रदर्स यांच्या चित्रपटांनी प्रेक्षकांना जितकं घाबरवलं, तितकीच त्यांनी बॉक्स ऑफिसवर दमदार कमाईसुद्धा केली. कमी बजेटमध्ये बनलेले हे चित्रपट प्रेक्षकांना खूपच आवडायचे.