वाह, आता मुंबई पोलीस..; इम्रान खानला भारत सोडण्याची नोटीस; किरण रावची संतप्त प्रतिक्रिया, नेमकं काय घडलं?
Imran Khan: आंदोलनात सहभागी झाल्याने अभिनेता इम्रान खानला मुंबई पोलिसांनी थेट भारत सोडून जाण्यासाठी नोटीस बजावली आहे. या प्रकरणी आता आमिर खानची पूर्व पत्नी किरण रावने प्रतिक्रिया दिली आहे.
Imran Khan: अभिनेता आमिर खानचा भाचा आणि ‘जाने तू… या जाने ना’ या चित्रपटातून लोकप्रिय झालेला अभिनेता इम्रान खान सध्या एका वेगळ्याच कारणामुळे चर्चेत आला आहे. मुंबई पोलिसांच्या परदेशी नागरिक नोंदणी कार्यालयाने (FRRO) इम्रानला 28 ऑक्टोबरपर्यंत भारत सोडण्याची नोटीस बजावली आहे. या प्रकरणावर आता आमिरची पूर्व पत्नी आणि चित्रपट निर्माती किरण राव हिने सोशल मीडियाच्या माध्यमातून प्रतिक्रिया दिली आहे. ‘वाह! आता मुंबई पोलीस?’ अशा शब्दांत तिने आश्चर्य व्यक्त केलं आहे. तिची ही प्रतिक्रिया सध्या चर्चेचा विषय ठरत आहे.
इम्रान खानला भारत सोडण्याची नोटीस बजावल्याची बातमी समोर आल्यानंतर किरण रावने इन्स्टाग्राम स्टोरीवर प्रतिक्रिया दिली. ‘वाह, आता मुंबई पोलीस?’ असं म्हणत तिने आश्चर्य व्यक्त केलं. इम्रानने आयुष्यातील मोठा काळ भारतात घालवला आहे. इथंच त्याचं शिक्षण, काम आणि वैयक्तिक आयुष्य घडलं, हा मुद्दा किरणने अधोरेखित केला. तिच्या या भूमिकेमुळे मनोरंजन विश्वात या प्रकरणावर चर्चा सुरू झाली आहे. अभिनेता आणि हृतिक रोशनची जोडीदार सबा आझाद हिनेदेखील या नोटीसवर नाराजी व्यक्त केली आहे. ‘वय 43 वर्षे, त्यापैकी 40 वर्षे भारतात घालवली. इथेच शिक्षण घेतलं, काम केलं, यश मिळवलं, अपयश पचवलं, प्रेम मिळवलं आणि संघर्षही केला’, अशा आशयाची पोस्ट किरण रावने इम्रानसाठी लिहिली आहे.
किरण रावची पोस्ट-
या संपूर्ण प्रकरणाची सुरुवात 10 ऑक्टोबर रोजी मुंबईतील ऑगस्ट क्रांती मैदान परिसरात झालेल्या आंदोलनापासून झाली. मुख्य निवडणूक आयुक्त ज्ञानेश कुमार यांच्या राजीनाम्याची मागणी करणाऱ्या आंदोलनात इम्रान सहभागी झाला होता. मतदारयाद्यांच्या विशेष सखोल पुनरीक्षण प्रक्रियेबाबत (SIR) कथित अनियमिततेच्या मुद्द्यावर हे आंदोलन करण्यात आलं होतं. या आंदोलनादरम्यान इम्रान, त्याची प्रेयसी लेखा वॉशिंग्टन आणि इतर आंदोलकांना मुंबई पोलिसांनी काही काळ ताब्यात घेतलं होतं. त्यानंतर इम्रानच्या सहभागाबाबत प्रश्न उपस्थित करण्यात आलं. भाजप नेते किरीट सोमय्या यांनीही यासंदर्भात तक्रार केली होती.
इम्रान खानकडे अमेरिकेचं नागरिकत्व असून त्याच्याकडे ओव्हरसीज सिटिझन ऑफ इंडिया (OCI) कार्ड आहे. मात्र, OCI कार्ड म्हणजे भारतीय नागरिकत्व नव्हे. आंदोलनातील सहभागामुळे इमिग्रेशन आणि फॉरेनर्स अॅक्ट, 2025 मधील तरतुदींचं उल्लंघन झाल्याचा आरोप करत FRRO ने त्याला 28 ऑक्टोबरपर्यंत भारत सोडण्याची नोटीस बजावली आहे. दरम्यान, इम्रानच्या वकिलांनी या नोटीसला मुंबई उच्च न्यायालयात आव्हान देण्याची तयारी दर्शवली आहे. OCI कार्डधारकांना आंदोलनात सहभागी होण्यास कायद्याने स्पष्ट मनाई आहे का, तसंच या कारवाईचा कायदेशीर आधार काय आहे, असे प्रश्नही उपस्थित होत आहेत. या प्रकरणात न्यायालय काय निर्णय देणार, याकडे सर्वांचं लक्ष लागलं आहे.
