Sonalee Kulkarni: हा ड्रेस म्हणजे काही हिंट तर नव्हे? गरोदरपणाच्या चर्चांवर अखेर सोनालीने दिलं उत्तर

गेल्या काही वर्षांत पोलका डॉट ड्रेसचा अर्थच जणू बदलला आहे. अभिनेत्री अनुष्का शर्माने सर्वांत आधी पोलका डॉट ड्रेस (polka dot dress) परिधान करत गरोदर (pregnancy) असल्याचं जाहीर केलं होतं. त्यानंतर जणू हा ट्रेंडच सुरू झाला. क्रिकेटर हार्दिक पांड्याची पत्नी नताशा स्टँकोविक, टीव्ही अभिनेत्री अनिता हसनंदानी यांनीसुद्धा पोलका डॉट ड्रेस परिधान करत प्रेग्नंट असल्याची गोड बातमी चाहत्यांना दिली होती. त्यामुळे आता कोणत्याही सेलिब्रिटीने पोलका डॉट ड्रेस परिधान केला की जणू ती प्रेग्नंसीच जाहीर करणार की काय, असा प्रश्न चाहत्यांमध्ये उपस्थित होतो. असंच काहीसं मराठमोळी अप्सरा म्हणजेच अभिनेत्री सोनाली कुलकर्णीसोबत (Sonalee Kulkarni) घडलं. सोनालीचा ‘तमाशा लाईव्ह’ हा चित्रपट नुकताच प्रदर्शित झाला. या चित्रपटाच्या प्रीमिअरसाठी सोनालीने पोलका डॉट ड्रेस परिधान करत सोशल मीडियावर फोटो पोस्ट केले होते. त्यावरून सोनाली लवकरच गुड न्यूज देणार की काय, असा सवाल चाहते करू लागले.

‘हा ड्रेस म्हणजे काही हिंट तर नव्हे,’ असं एका चाहत्याने कमेंट बॉक्समध्ये लिहिलं. तर ‘पोलका डॉट.. गुड न्यूज लवकरच मिळेल वाटतं’, असं दुसऱ्या युजरने म्हटलं. ‘काळा ड्रेस आणि त्यावर पांढरे ठिपके, म्हणजे तू गरोदर आहेस’, असा थेट दावाच एका नेटकऱ्याने केला. सोशल मीडियावर या चर्चांना उधाण आल्यानंतर अखेर सोनालीने त्यावर उत्तर दिलं. ‘जे सर्वजण मला विचारत आहेत त्यांना मी सांगू इच्छिते की मी प्रेग्नंट नाही. मी नुकताच माझा ड्रीम परफॉर्मन्स तमाशा लाईव्ह या चित्रपटात दिला. तुम्हीसुद्धा थिएटरमध्ये जाऊन तो पहा,’ असं तिने लिहिलं.

सोनालीची पोस्ट-

View this post on Instagram

A post shared by Sonalee Kulkarni (@sonalee18588)

सोनालीचं उत्तर-

सोनालीचा ‘तमाशा लाईव्ह’ हा चित्रपट नुकताच प्रदर्शित झाला असून यातील गाणी सोशल मीडियावर चांगलीच हिट ठरली आहेत. विशेष म्हणजे अभिनय आणि नृत्यासोबतच सोनालीने यातील काही गाणीसुद्धा गायली आहेत. चित्रपटात सोनालीसोबतच सचित पाटील, सिद्धार्थ जाधव, हेमांगी कवी, पुष्कर जोग, नागेश भोसले, मृणाल देशपांडे, मनमीत पेम, आयुषी भावे, भरत जाधव यांच्या भूमिका आहेत. सोनाली लवकरच ‘डान्स महाराष्ट्र डान्स’ या रिअॅलिटी शोमध्ये परीक्षकाच्या भूमिकेत दिसणार आहे.