या बॉलिवूड अभिनेत्रीचं विमान नेपाळच्या पंतप्रधानांच्या पतीने केलं होतं हायजॅक; कारण ऐकून उडतील होश
अभिनेत्री माला सिन्हा यांचे विमान झाले होते हायजॅक! नेपाळच्या पहिल्या महिला सरन्यायाधीशांच्या पतीचा होता धक्कादायक संबंध. नेमकं काय घडलेलं?
1950 ते 1970 या काळात हिंदी चित्रपटसृष्टीवर आपल्या अभिनयाची छाप पाडणाऱ्या ज्येष्ठ अभिनेत्री माला सिन्हा यांनी अनेक सुपरहिट चित्रपट दिले. धर्मेंद्र, शम्मी कपूर, गुरुदत्त, राजकुमार, मनोज कुमार यांसारख्या दिग्गज कलाकारांसोबत त्यांनी काम केले. आपल्या चार दशकांहून अधिकच्या कारकिर्दीत त्यांनी हिंदी, बंगाली आणि नेपाळी भाषांतील शंभरहून अधिक चित्रपटांमध्ये भूमिका साकारल्या. मात्र त्यांच्या आयुष्यात घडलेली एक घटना आजही अनेकांना माहिती नाही. 1973 मध्ये माला सिन्हा प्रवास करत असलेले विमान हायजॅक करण्यात आले होते.
10 जून 1973 रोजी नेपाळ एअरलाइन्सचे विराटनगरहून काठमांडूकडे जाणारे विमान काही नेपाळी काँग्रेसच्या कार्यकर्त्यांनी हायजॅक केले होते. त्या वेळी विमानात सुमारे 19 प्रवासी प्रवास करत होते. याच प्रवाशांमध्ये प्रसिद्ध बॉलिवूड अभिनेत्री माला सिन्हा यांचाही समावेश होता. ही घटना नेपाळच्या इतिहासातील पहिल्या विमान अपहरणाच्या घटनांपैकी एक मानली जाते. या हायजॅकमध्ये सहभागी असलेल्या प्रमुख व्यक्तींमध्ये दुर्गा प्रसाद सुबेदी, नागेंद्र धुंगेल आणि बसंत भट्टाराई यांचा समावेश होता.
हायजॅकचा उद्देश प्रवाशांना इजा करणे नव्हता
या विमान अपहरणामागे प्रवाशांना नुकसान पोहोचवण्याचा हेतू नव्हता. त्या विमानातून नेपाळ राष्ट्र बँकेचे सुमारे 30 ते 40 लाख रुपये काठमांडूला नेले जात होते. तत्कालीन राजेशाहीविरोधातील सशस्त्र आंदोलनासाठी निधी उभारण्याच्या उद्देशाने ही रक्कम लुटण्याची योजना आखण्यात आली होती.
राजा महेंद्र यांच्या राजवटीविरोधात सुरू असलेल्या आंदोलनाला आर्थिक बळ देण्यासाठी ही कारवाई करण्यात आल्याचे सांगितले जाते. या संपूर्ण योजनेचे सूत्रधार गिरिजा प्रसाद कोइराला होते. पुढे ते नेपाळचे पंतप्रधानही झाले.
दुर्गा प्रसाद सुबेदी नेपाळी काँग्रेसचे युवा नेते
या घटनेतील आणखी एक आश्चर्यकारक बाब म्हणजे हायजॅकमध्ये सहभागी असलेले दुर्गा प्रसाद सुबेदी यांनी पुढे सुशीला कार्की यांच्याशी विवाह केला. सुशीला कार्की या 11 जुलै 2016 रोजी नेपाळच्या पहिल्या महिला मुख्य न्यायाधीश बनल्या. त्या काळात दुर्गा प्रसाद सुबेदी हे नेपाळी काँग्रेसचे युवा नेते होते. त्यांच्या राजकीय आयुष्यातील सुरुवातीच्या काळातील ही घटना नंतरही चर्चेचा विषय ठरली.
माला सिन्हा यांनी चार दशकांहून अधिक काळ चित्रपटसृष्टीत यशस्वी कारकीर्द घडवली. त्यांनी हिंदी, बंगाली आणि नेपाळी भाषांतील 100 हून अधिक चित्रपटांमध्ये अभिनय केला.
