करोडपती युट्यूबरने पॉडकास्टमध्येच पत्नीला दिला घटस्फोट; नेटकरी हैराण!
या प्रसिद्ध युट्यूबरने पॉडकास्टमध्येच पत्नीला घटस्फोट देत असल्याचं जाहीर केलं आणि तिला कायदेशीर नोटीस पाठवली आहे. लग्नाच्या अवघ्या दीड वर्षातच त्याने पत्नीपासून विभक्त होण्याचा निर्णय घेतला आहे.
पाकिस्तानातील सर्वांत श्रीमंत युट्यूबर आणि अत्यंत आलिशान लाइफस्टाइलसाठी ओळखला जाणारा रजब बट्ट सध्या त्याच्या खासगी आयुष्यामुळे चर्चेत आला आहे. एका पॉडकास्टदरम्यान त्याने पत्नी ईमान फातिमाला घटस्फोट देत असल्याचं जाहीर करत सर्वांनाच मोठा धक्का दिला. त्यानंतर आता रजबने पत्नीला घटस्फोटाची कायदेशीर नोटीससुद्धा पाठवली आहे. घटस्फोटाची नोटीस सोशल मीडियावर शेअर करत ईमानने सर्वांना याबद्दलची माहिती दिली आहे. लग्नाच्या दीड वर्षानंतरच रजबने पत्नीपासून विभक्त होण्याचा निर्णय घेतला आहे. रजबने माझ्यावर खोटे आरोप करत मला आणि माझ्या चिमुकल्या मुलाला एकटं सोडलंय, असा आरोप ईमानने केला आहे. रजबने पॉडकास्टमध्ये म्हटलं की तो आता खोटं आणि बनावट संबंध ठेवण्याच्या बाजूने नाही. इतकंच नव्हे तर त्याने त्याची पत्नी आणि सासरच्या लोकांवरही बरेच आरोप केले आहेत.
“या लग्नात माझा कोणताही आदर नव्हता. माझ्या पत्नीने माझ्या आईचा अपमान केला. तिच्या कुटुंबातील सदस्यांनी माझ्या वडिलांच्या स्थितीवर प्रश्न उपस्थित केले. आता मी माझ्या पालकांचा आणखी अनादर सहन करू शकत नाही. त्यामुळे मी या नात्याला आणखी एक संधी देणार नाही. कारण माझ्या लग्नाला दीड वर्ष झालं आहे, परंतु माझी पत्नी फक्त दीड महिना माझ्यासोबत होती”, असे आरोप त्याने पॉडकास्टमध्ये केले. याआधी ईमानच्या भावाने रजबवर पत्नीच्या गरोदरपणादरम्यान तिची फसवणूक केल्याचा आरोप केला होता. यावर त्याने प्रतिक्रियासुद्धा दिली होती. माझं एक अफेअर होतं, जे संपायला थोडा वेळ लागला, अशी कबुली त्याने दिली होती. यावेळी त्याने त्याची चूकसुद्धा स्वीकारली आणि पत्नीची माफी मागितली होती.
दुसरीकडे ईमानने घटस्फोटाची नोटीस सोशल मीडियावर शेअर करत तिच्या भावना व्यक्त केल्या आहेत. ‘हे नातं वाचवण्यासाठी मी गप्प बसले होते. तरीही एका पॉडकास्टमध्ये माझ्यावर खोटो आरोप करण्यात आले आणि त्यानंतर ही कायदेशीर नोटीस पाठवण्यात आली. मला फक्त एवढंच विचारायचं आहे की माझं आणि माझ्या मुलाचं काय चुकलंय? मला खूप काही सांगायचं आहे. पण रमजान महिन्याचं पावित्र्य लक्षात घेऊन मी अजूनही गप्प आहे’, असं तिने म्हटलंय.
2024 मध्ये रजब आणि ईमान यांचा निकाह पार पडला होता. या दोघांचा लग्नसोहळा पाकिस्तानमधील सर्वांत भव्य लग्नसोहळ्यांपैकी एक होतं. या लग्नाचे व्हिडीओ सोशल मीडियावर व्हायरल झाले होते.
